Nongpoh, Nohprah 04: Haba kren halor ka khuid ka suba bad ka jingdonkam ban ïada ïa ka mei mariang, naduh ka sorkar kmie haduh ka sorkar jylla ki ju ïalap halor ka khuid ka suba bad la ju ai ka jinghikai sha ki paidbah, hynrei la iohi ba kane kam treikam satia ha kaba haduh mynta dang don bun ki paidbah kiba ym pat sngewthuh bad ïa ki jaboh ki la shu bret pathar ha ki jaka paidbah.
Kane na ka jingleh khlem akor, ka dei ka jingbret jaboh ha ki Nala um ka surok 4-lane ha Ri Bhoi, ha kaba ha ka por lyiur ki paidbah ki khnum na ka jingshlei um bad ha ka por tlang pat ki pynlong ka jaka theh niut ha ki nala um kaba long kawei na ka daw ka jingshlei um ha ka por ba lyiur ne ka aiom slap.
Kumba la lap ne sakhi, kawei na ka jaka ha Baridua ha ka thain Khanapara, ki dukan kiba shong harud ka surokbah ki la pynlong pynban ïa ka nala um jong ka surokbah ban pynlong kum ka jaka theh niut bad ïa kane la iohi ba kam don kano kano ka jingteh lakam la ka long na ka NHAi ne na ki bor shnong.
Kaei kaba la pynlong ïa u nongthoh khubor ban thoh halor kane ka jinglap bad ka jingbym kit khlieh ki nongshong dukan, ka dei ba kim don jingsngew satia halor ka jingshah ktah ka mariang, ïa ki plastic ne ki klat platic ba ki dih sha la shu bret beit ha ki nala um ka surok bad haba peit ne iohi ka long ka Jingijli bad kaba ym lah ban pdiang ba katba dang ïalap halor ka khuid ka suba, katta ki paidbah kim pat sngewthuh bad kam pat rung kata ka mynsiem ha ka jingmut jingpyrkhat ban lehkhuid.
Kumba lap ne iohi, lada ka long ha kane ka rukom, ka long shisha kaba eh ba ka sorkar kan pynlong ïa kata ka jylla ne ka ri kaba khuid, lada ha ka jingmut jingpyrkhat ki paidbah kam pat rung kata ka jingkordor jong ka khuid ka suba ne ban ïada ïa ka mei mariang.
