Kylla ïingjah ka jaka thaiñ bad thir ksai ha Mawiong, jurip ka MDC, yn pynsngew sha ka Sorkar

Nongpoh, Nailar, 19: Ka kong Rona Khymdeit MDC ka Nongpoh mynta ka sngi ka la leit ban jurip ïa ka Common Facility Center kaba ba dei ka jingtei jong ka sorkar ba la shu iehnoh iingjah bun tylli ki snem khlem lah ban pyntreikam ïa ka ha ka shnong Mawiong ha Ri-Bhoi District kaba dei ka iing ba la thmu ban ailad ïa ki longkmie ban pynlong kum ka jaka thaiñ jaiñ bad ka jaka thir ksai kaba hap hapoh Pahambir Cluster.
Ïa katei ka Common Facility Center la tei naduh u snem 2012-2013 ha ka jinglut kaba la kut kumba T.20 lakh lyngba ka skhim BRGF hynrei naduh ba la dep ban tei ïa ka katei ka iing, ym tip satia ïa ka daw ba ym shym la lah ban pyntreikam ïa ka.
Kum ka MDC ka Nongpoh Constituency ka kong Rona Khymdeit hadien ka jingpynsngew jong ki paidbah lem bad ki nongïalam shnong mynta ka sngi ka la shimkhia ban leit jurip syndon ïa katei ka iing ban ïohi ïa ka jinglong jingman jong ka ha ka jingdon ryngkat u Rangbah Shnong ka Mawiong u Bah Mathius Maring, u Secretary Shnong u Bah Crosmel Maring, u Bah A. Maring Secretary ka Raid Nonglyngdoh, lem bad ki riew rangbah katei ka shnong.
Haba kren ha kane ka sngi ka Kong Rona Khymdeit ka la ong ba katei ka iing ka dei kaba la pynlut da ki lakh ïa ka pisa sorkar hynrei kaba sngewsih ka long ba haduh kine ki sngi kam shym la treikam satia bad ka long ka jingduhnong ïa ki nongthaiñ jaiñ, kumta hadien ka jingpynsngew ki nongïalam shnong ka la shimkhia mynta ka sngi ban ïohi da la ki jong ki khmat bad hadien ka jingjurip ka la kular ban shimkhia ïa katei ka kam ban pynsngew sha ka sorkar ba dei ban pyntreikam noh mardor na ka bynta ka jingmyntoi bad ka jingbit jingbiang jong ki nongthaiñ jaiñ ha katei ka thaiñ.