Nongpoh, Nailar 21: Ka Khasi Students’ Union (KSU) ka la mih shakhmat ban pynpaw ïa ka jingsngewkhia kaba jur hadien ba ka la iohi ba ka sorkar jylla kat dang mih ki sngi ka la dang khein sting ban shim ïa kita ki lad jingïada na ka jingwan rung kyrthep ki briew kiba na shabar ka jylla ba kum ka seng ka la ju dawa na ka por sha ka por halor ka jingma kaba ap na ka jingwan rung kyrthep ki briew kiba nabar ïa ki trai muluk ki trai jaka hapoh ka jylla.
Ka KSU ka la mih shakhmat ruh ban kren halor kane ka mat ne ka phang, ka dei hadien ba kum ka seng ka la lap ba haduh mynta ka sorkar kam pat lah ban pyntreikam ïa kita ki aiñ kiba la don lypa khamtam ka aiñ ba la tip kum ka Meghalaya Residents Safety and Security Act, 2016 ba dei ban pyntreikam noh katba ka sorkar kmei kam pat lah ban ai ïa ka Inner Line Permit (ILP) kaba dei kawei na ka jingdawa ka seng ban pyntreikam ha ka jylla na ka bynta ban tehlakam ne khanglad na ka jingwan rung kyrthep ki briew kiba na shabar ka jylla.
Haba ïa kren mynta ka sngi bad u Mawphor, u President ba rangbah ka Seng KSU, u Samla Lambok Starwell Marngar u la ong ba ka seng KSU ka dap shisha da ka mynsiem kaba sngewkhia ha kaba kat dang mih ki sngi dang jyllei kata ka jingwan rung kyrthep ki briew kiba na shabar ka jylla, hynrei kaba sngewsih ka long ba ka sorkar jylla pat kam shym la shim ïa kita ki lad ki lynti kumno ban ïada na kane ka jingwan rung kyrthep ki bar jylla.
U la pynpaw ruh da kaba ong kumba long haduh mynta ka seng KSU ka dang ieng skhem ban dawa na ka bynta ban pyntreikam ïa ka Inner Line Permit hapoh ka jylla, ha kaba ka seng ka dang ap ruh ïa ka jingmynjur na ka sorkar kmie bad kum ka seng ban tehlakam na kane ka jingwan rung kyrthep ki bar jylla ka la ju dawa ban pyntreikam noh ïa ka Meghalaya Residents Safety and Security Act, 2016 khang ban ïada na ka jingwan rung kyrthep ki bar jylla bad kaba sgewsih ka long haduh mynta ka sorkar kam shym la lah ban pyntreikam ïa kane ka aiñ.
U la ïathuh ruh ha ka jingshisha ka sorkar ha snem 2020 ka la lah ban plie noh ïa ka entry point ha Umling da ka jingthmu ban talasi ne tehlakam ïa ki briew kiba wan na shabar ka jylla, hynrei kaba sngewsih ka long tang hadien ba la dep plie da u symbut myntri rangbah ka jylla, kane ka entry point ha Umling ka la kut noh ruh hadien ba la kut ka khlam COVID-19 ha kaba ha kitei ki por ki la pynlong kum ka Covid-19 Facilitation Centre cum entry point bad kaba sngewlyngngoh shuh kane ka entry point kumba la thmu kam treikam shuh haduh kine ki sngi na ka daw ka jingkheiñ sting ka sorkar jylla.
“Haba kren halor ka Meghalaya Residents Safety and Security Act 2016, hapoh kane ka ain ka la don ruh kata ka District Task Force Committee ba khlieh da u deputy Commissioner kum u Chairman bad la mang ruh ban buh ïa ki kyrdop na ka bynta ban talasi ïa kito kiba wan na shabar ka jylla bad kaba sngewlyngngoh pat haduh mynta ka sorkar kam pat lah ban pyntreikam ba kum ka seng ka sngewkhia halor ka jingma kaba ap na ka jingwan rung kyrthep ki bar jylla.” Ong u Samla Lambok Starwell Marngar, President ka KSU.
U la ïathuh ruh ha ka jingshisha ka KSU ka la dawa ban pyntreikam ïa ka Inner Line Permit naduh ka jingsynshar ka sorkar MUA-II ba la ïalam da u Dr. Mukul Sangma kum u myntri rangbah ba kane ka sorkar kam kwah satia ban pyntreikam ïa ka ILP bad ka kwah ban pyntreikam da ka Meghalaya Resident Safety and Security Act,2016 kum ka jingïakhun pyrshah na ka jingwan rung kyrthep ki briew kiba na shabar ka jylla bad kaei kaba sngewlyngngoh ka long ba haduh kine ki sngi ba la synshar ka sorkar MDA kim pat lah satia ban pyntreikam ïa kane ka aiñ kaba thmu ban khanglad na ka jingwan rung beiañ ki briew kiba na shabar ka jylla.
U la ong ruh ka seng ka sngewkhia halor kane ka jingleh sting ka sorkar jylla haduh kine ki sngi ba kum ka seng kam pat iohi satia ïa kita ki dak ki shin ba kan shim khia na ka bynta ban ïa khun pyrshah na ka jingwan rung kyrthep ki briew kiba narbar ka jylla bad kumba paw shabar katei ka entry point ba la dep plie da ka sorkar ruh mynta ka la kylla ïingjah khlem da don kita kiba peit ba khmih na ka bynta ban khanglad na ka jingwan rung beiñ ki briew kiba na shabar ka jylla.
Shuh shuh, u la bynrap ruh da kaba ong ba ka seng katba ka sorkar kmie kam pat lah ban ai ïa ka ILP ban pyntreikam hapoh kane ka jylla, ka seng ka dawa na ka sorkar ba ka dei ban pyntreikam shuwa ïa ka Meghalaya Residents Safety and Security Act namar lada pynteikam ïa kane ka aiñ ruh kan ïarap shibun ban tehlakam na ka jingwan rung beaiñ ki briew kiba na shabar ka jylla bad khamtam ha kane ka ain ka don ruh kata ka District Task Force Committee bad ruh ki khyrdop ba dei ban pynieng da ka sorkar ha ka phasi-I bad Phase-II ha kaba duh mynta kim pat treikam satia, u la bynrap.
