Kylla ïing jah ka ophis sorkar, ha ka jingshisha ka dei ka ophis kaba la ai kam bad seng kam ïa ki samla: HNYF

Mawsynram, ‘Nailur, 13: Ka Hynñiewtrep National Youths Front (HNYF) jong ka Southern Border Area ka la leit jurip ïa ka ophis jong ka Commerce & Industrial Training cum Production Centre, Mawsynram, East Khasi Hillls District ha kaba la lap ba la shu khang kyrdep bad ka la kylla ïing jah bad ym shem la don wat iwei ruh i nongtrei ha kane ka ophis.
Ïa ka kynhun ban leit jurip la lamkhmat da u bah Kyllang Thongni, President jong ka Hynñiewtrep National Youths Front (HNYF) jong ka Southern Border Area ha ryngkat ka jingsynlang lang ki dkhot jong ka HNYF.
Hadien ka jingjurip, u bah Kyllang Thongni ha kren ha ki lad pathai khubor u la pynpaw ka jingsngewdiaw halor kane ka bynta namar ba ha ka jingshisha kane ka ophis Commerce & Industrial Training cum Production Centre, Mawsynram ka dei kawei ka lad ban ai kam ai jam ïa ki samla namar ka dei ruh ka ophis ban ai jinghikai ïa ki samla na kane ka dong ka thaiñ ba kumno ban lah ban seng kam seng jam kaba lah bn long ruh kawei na ki lad ban kyntiew ha ka ïoh ka kot.
Shuh shuh ha ka jingkren jong u, ula buh ruh ka jingkylli balei kane ka ophis kam lah ban ai jingshakri na ka bynta ki paidbah ka thaiñ kumba ha kine ki snem ba la dep la ïohi ba ka don jingkyrmen hynrei mynta la lap pynban ba ïa kane ka ophis la syrtap sa tang da u phlang bad ki ïing ki la kylla iing jah. “Lada long tang katne kane ka ophis kan sa long ka ktem ba ki riew sniew ha kaba kin sa shim kabu ban leh ïa kiei kiei ki kam kiba sniew ha kane ka ïing sorkar”, ong u bah Kyllang.
Namarkata, ka HNYF lyngba ka kyrwoh na u President ka kyntu ïa ka kane ka tnad ophis jong ka Sorkar ba lada kum ka seng kan wan jurip biang sa shisien kan da lap bad ïohi ïa ki nongtrei bad kumjuh kine ki sawdong sawkun kin long kiba khuid ba suba.