Nongstoiñ, Ïaïong 25: Ka jingbyrthen jong ki sordar jong ki hynñiew shnong, ki paitbah bad ki sengbhalang ha kaba ïadei bad ka jingpyntrei ïa ka surok na Nongstoiñ sha Sohpian kaba jngai tang kumba hynñiew kilomitar, ka la kylla long pynban ka drama ha kine ki sngi.
Hadien ka jingbyrthen, u kontraktor tang ban pynbyrngia bad pynthame ïa ki paitbah nongleit nong wan, ki sordar shnong bad ki sengbhalang u la sdang biang ban siang rong bad pynheh tang kumba lai haduh saw inshi narud narud kata ruh ym baroh shilynter, hynrei tang ha ki katto katne ki bynta kiba ka surok ka rit palat hynrei baroh shilynter pat u shu theh da ka khyndew khlem khleh mawria.
Ym lah ban len ba ka jingtheh khyndew narud narud ka la kham pynsuk shi rukom ïa ki nongñiah kali haba ki kiar ïa kiwei pat, hynrei katei ka khyndew ba theh pat tang shu wan u slap kan ym neh satia bad kan pynkylla ktieh pynban ïa ka surok. Haba ïakren bad ki nongñiah kali kamai kiba ïaid man ka sngi, ki la ong ba katei ka jingleh jong u kontraktor imat ka dei tang ban pynthame ïa ki paitbah, namar ka jingshah kynthoh palat hynrei katei ka khyndew kan shah rong lut ha ka um slap bad ka jingkynthoh ki paitbah kan nang kham jur shuh shuh.
Halor ka jingpyntrei ïa katei ka surok ki don pat kiba ong ba lada ki nongsynshar shnong bad ki sengbhalang ki kwah ba ki paitbah kin ai ka jinghkyrshan, ki dei ban leit wad jingtip bniah na ka tnad PWD katno la mang pisa na ka bynta ban shna ïa katei ka surok, katno ka jingïar, katno ka jinglut ha ka shi kilomitar bad sa pyllait paitbah, hynrei lada shu ïa dait bad kynthoh tang ha ki social media kam don jingmut satia.
Nalor kata ki la ong ruh ba lada kim lah ban leh kumta, wat kito kiba kynthoh ruh kin sa shah kynnoh ha ki paitbah ba ki la shah pynbiej da ka tyngka, namar lada shu kynthoh khlem ki jingpynshisha da ki jingthoh jingtar, kam long kaba dei bad ki paitbah ha kine ki sngi kim dei shuh kiba dang biej ba kin shu ngeit katba kren ki briew.
Hynrei lada ki la lah ban sei bad thad madan ïa kino kino ki kam, ryngkat ki jingpynshisha lyngba ki jingthoh jingtar ba ki la ïoh na ki bor kiba peit ba khmih ïa kino kino ki tnad trei kam, ki paitbah kin ym kyrngah ban ai ka jingkyrshan ym tang da ka ktien, hynrei wat ban noh synñiang ha ki jinglut jingsep ruh ki long kiba kloi tangba kano kano ka kam ka dei ban poi haduh ka jingjop.
