Kwah u Myntri Rangbah ban pynkiew ka khajna ki jylla barit sha ka 25% na ka Finance Commission

Shillong, Naitung 07: Ki nongïalam na ki saw tylli ki Jylla ka thaiñ shatei lammihngi-Meghalaya, Mizoram, Tripura bad Sikkim, ba kynthup ia u Myntri Rangbah ka jylla u Conrad Sangma ki la ïakynduh ïa ka 16th Finance Commission ha New Delhi bad buh lang hakhmat ïa ki jingdawa ba ïadei bad ka jingai song pisa.
Ïa kane ka jingïalang la pynïaid da u Myntri Rangbah ka Meghalaya Conrad K Sangma bad ïashimbynta da u Myntri Rangbah ka Mizoram Lalduhoma, Myntri pla tyngka ka Tripura Pranajit Singha Rou bad ki heh ophisar na Sikkim.
Ha kaen ka jingïalang kane ka kynhun ka la ban jur ïa ka bynta ba kongsan jong ki jingai jingmut ka Finance Commission haba pynshong nongrim ïa ka bhah jong ki khajna ka Sorkar Pdeng ba ju ai sha baroh ki Jylla. Kila pynpaw ba kane ka jingkyrshan ka long kaba donkam bha na ka bynta ka jingkiew ka ïoh ka kot jong ki jylla barit ka thaiñ shatei lammihngi, ba bunsien ki ju ïakynduh ïa ki jingduna pisa.
Ha kane ka jingïalang u Myntri Rangbah ka Jylla Meghalaya ula ban jur ba ka 16th Finance Commission kan ai jingmut ba la kumno kumno ruh ban pynkiew noh ïa ka bhah khajna ki Jylla barit ka sha ka 25% na kaei kaba ai da ka 15th Finance Commission bad ruh ïa ka song pisa ba kyrpang ban tei ïa ki jingtei ha kine ki jylla.
Kane ka jingdawa ba la ïamynjur lang da baroh saw tylli ki jylla ka la ïoh ïa ka jingkyrshan da kawei ka sur na baroh ki jylla kiba la ïashimbynta ha ka jingïalang.
Ha kane ka jingïakren u Chairman bad ki dkhot ka 16th Finance Commission kila jubab kaba sngewtynnad, haba kubur ïa ki jingeh ba kham pher bad ka jingkiew ka ïoh ka kot ha kine ki jylla barit ka thaiñ shatei lammihngi ha kane ka Commission ba dang ïaid mynta ka 15th Finance Commission.
Ha ka jingïalang la pynpaw ba ka jingpynkiew ba 20% ïa ka jingsam bhah khajna na ka 14th sha ka 15th Finance Commission kaba la lam sha ka jingkiew ba 100% ha ka jingpynlut pisa ne capital expenditure. La ong ba kane ka jingpynlut ka la ïarap bha ban pynjanai ha ki kam ba ïadei bad ka koit ka khiah, ki kam jngohkai bad ki jingtei bapher bapher hapoh kine ki thaiñ shatei lammihngi.
La ong ruh ban pynneh kumjuh ïa kane ka jingkiew ki jylla, ka kynhun ka la kyrpad ïa ka Commission ba kan ai jingmut noh ha ka ban pynkiew 25% ïa ka bhah khajna sha ki jylla barit jong ka thaiñ shatei lammihngi. Ki la tyrwa ruh ban pynkha ïa ka Special Infrastructure Fund ne ka song pisa ba kyrpang ïa ki jingtei, ban lah pynurlong ïa ki jingdonkam ka roi ka san ba kham pher ha kine ki thaiñ. Kane ka jingtyrwa ka la ïoh ïa ka jingkyrshan na baroh saw tylli ki Jylla.
Ka 16th Finance Commission, ba la ïalam da u Dr Arvind Panagariya, ka la kubur ïa ki jingeh bad ka jingkiew ha kane ka thaiñ. Ki saw jylla ki la aiti ruh ïa ka dorkhas ba kdew ïa ki jingeh bad ki jingangnud jong ki jylla ha kane ka jingïalang.
Kane ka jingïakren kaba la pynbeit da ka Tnad Finance ka Jylla Meghalaya, ka la kut hapdeng ka jingkyrmen, ha kaba baroh ki nongïashimbynta kila pynpaw ïa ka jingkyrmen ban ïohi ïa ki jingai jingmut kiba bha, ki ban kyrshan ïa ka jingbteng ka roi ka san jong ka thaiñ shatei lammihngi.