Kwah u MLA ban tip katno ki karkhana shna dewbilat ki la synñiang ha Meghalaya

Shillong, Jylliew 28 : Ka jingther u lapbah kaba la wanrah ka jingshlei um bad jingtwa ki lum ki wah, ki surok, ki ïing ki sem bad khamtam ka jingiap jong ki 35 ngut ki mynsiem briew bad dang jah rngai sa 11 ngut kat haduh mynta ka sngi ka la wanrah ka jingshah ktah kaba khraw ïa ka jylla bad kan shim por ruh ïa ka sorkar ban pynbha bad maramot pat ïa kine kiba la shah pynjot pynjulor bad khamtam ka jingduh ïa ki mynsiem briew.
Na ka liang u MLA jongka Mawlai u bah P.T Sawkmie u la pynpaw ka jingsngewtynnad haba u la ïohi lyngba ki lad pathai khubor bad ïoh jingtip ba ki karkhana dewbilat na kane ka jylla ki noh synñiang sha ka Assam kata ka Star Cement 1 klur tyngka, ka Dalmia Cement 50 lak tyngka bad ka Topcem Cement 31 lak tyngka. U la ong “ Ka dei ka rukom ïa kino kino ki kompani ban noh synñiang sha kino kino ki jylla kiba mad ïa ki jingshah lyngshop ha ki bor mariang hapoh ka ri, hynrei kaba nga kwah ban tip shai ka long katno kine ki kompani ki la noh synñiang ha kane ka jylla. Namar kine ki kompani ki pynmih dewbilat na u mawshun jongka jylla Meghalaya bad ki ïoh ruh ïa ka subsidy na ka sorkar jylla kumta ban tip ki paidbah ïa ka jingnoh synñiang jongki ki dei ban pynpaw lyngba ki lad pathai khubor katno klur ne lak ki la noh synñiang sha ka Chief Minister Rellief Fund jongka Meghalaya kumba ki la noh synñiang sha ka Chief Minister Relief Fund jongka Assam”.
U la ong “ Ngim sngew bishni haba ki leh kam babha sha kiwei ki jylla ruh hynrei ngi shu kwah ban tip nalor ba ki klong ïa ka spah na kane ka jylla kumta kwah ruh ban tip pat keiñ katno ki la noh synñiang haba ka jylla ka la mad ïa kine ki jingshah lyngshop ha ki bor mariang” ong biang u bah Sawkmie.
Na ka liang ki bor pynïaid ka Star Cement ki la pynpaw ba ki la noh synñiang ha ka jingtwa jong ka surok ha Lum Shnong sha kito kiba sahkut namar ym lait ïaid shuh na katei ka surok da ki bam, nalor kata ki la pynpaw ba dei ruh na ka surok jongka Star Cement ba la shah ban ïaid ki kali rit. Shuh shuh la ïathuh ba ki la noh synñiang sha South Garo Hills ruh. Hynrei kat haduh mynta ka sngi na ka liang ki bor ba halor ne ka Management jongka Star Cement kim pat ïathuh katno ki la noh synñiang sha ka CM Relief Fund.