Shillong, Jylliew 10 : U Myntri Rangbah ka Jylla Conrad K Sangma u kwah ban pynsted ïa ka jingtian bishar ïa ka mukotduma pyrshah ïa ka Sonam Raghuvanshi, kaba phah pyniap ïala u kurim u Raja Raghvanshi ha Sohra lem bad ïa ki 4 ngut ki runar ba leh ïa kane ka kam bymman.
“Hooid, ngi kwah ban pyndep kham kloi kat kaba lah ïa ka jingtian bishar bad kano kano ka sienjam kaba donkam ban shim na ka liang jong ngi kum ka Sorkar, ngin sa leh ïa kata bad ngin pyrshang ban pynïaid wut wut ïaka mukotduma” ong u Conrad.
Haba pynkut ïa ka jingwad bala neh palat shitaiew halor ka jingjah rngai ka Sonam Raghuvanshi, kane ka briew dalade kala leit ban pyndem hakhmat ki Pulit ha Nandganj Police Station, Ghazipur District, Uttar Pradesh katba 4 ngut pat la ïoh kem na Madhya Pradesh bad Uttar Pradesh namar ka jingdonkti ban pyniap ïa u Raja.
ïa ka Sonam kaba la pyndem ïalade ha Nandganj Police Station ha Ghazipur District, la shimti noh da ki Pulit ka Jylla Meghalaya bad yn sa wanrah ïa ka mynta ka sngi sha Shillong.
Haba ñiew ïa ka jingpynmih khubor bakla jong ki national media kum ka kam kaba sngewsih jur, u Myntri Rangbah ula ong “Ka long kaba sngewsih shibun ba katto katne ki lad pathai khubor kila pynkylla khongpong ïa kaei kaba jia bad pyrshang ban kynnoh ïa ki nongshong shnong ka Meghalaya bad ïa ka Jylla. Hynrei mynta ki jingshisha kila paw lut. Ngi tip kumno kane ka jingjia kala jia”.
“Nga la ju pynshisha ba ki nongshong shnong ka Meghalaya bad ki nongshong shnong ka thaiñ Shatei Lam Mihngi ki dei ki briew kiba long paralok ïa baroh, kiba ju kheiñ iïa ki nongwankai bad ki nongshangkai kum ki bahaïing hasem. Ki ju burom bad kitkhia bha ïa ki kumta ka long kaba sngewsih ba katto katne ki lad pathai khubor ki pyrshang ban pyni ïa kane ha ka lynti ka bym dei. Mynta ki jingshisha baroh ki la mih, kiei kiei baroh kila shai kdar lut” ula bynrap.
Haba ai khublei ïa ki Pulit ka Meghalaya ba kila lah ban sei ïa ki jingshisha hapoh ka por ba lyngkot eh, u Myntri Rangbah ula ong “Ngi la ïoh ïa ki khubor man ka khyllipmat. Kila ïohksai dang kloi bha ïa kiei kiei baroh hynrei kila kiar ban ïathuh namar ki sngew ba ka lah ban ktah ïa ka jingtohkit. Kumta, ngi lah ïaid jar jar ban tohkit bad nga sngewkmen ba ngi lah lah ban poi sha kaba kut”.
