Nongstoiñ, Nailar 25: Ki paidbah jong ki shnong khappud bad ka Assam ki angnud ba ka sorkar, kan phah їa ki ophisar jong ki tnad treikam ba kynthup ïa ki Officer jong ka District Horticulture bad District Agriculture Department jong ka West Khasi Hills District ki la leit ban iuh kjat ha ki shnong kiba don ha khappud bad ka Assam ba kynthup ïa ka Nongma, Nongmawlong, Langpih, Sohmarang, Mawdiangsnam, Nongmawleiñ bad bun kiwei kiwei ki shnong ha katei ka thaiñ.
Ki Sordar jong kitei ki shnong haba ïakren bad u Nongthoh khubor ha Langpih, ki la ïathuh ba ha ki snem ba la dep ki ophisar sorkar kiba peit ïa ka rep ka riang, ki la wan jurip ïa kitei ki shnong ha kaba ki paidbah ki la sngewkmen bad kyrmen ruh ba kin sa ïoh jingïarap na ka sorkar ha kaba ïadei bad ka rep ka riang, hynrei haduh mynta kim pat ïoh satia kino kino ki jingïarap.
Ki la ong ruh ba baroh ki nongshong shnong katei ka thaiñ, ki im da ka rep ka riang bad ka jaka ruh ka dei kaba sei soh haduh katta katta ha kaba baroh ki jait Diengsoh, ki kwai, Tympew, Kait, Sohtrun, bad kiwei kiwei ki dei ki mar rep kiba kongsan tam ha katei ka thaiñ. Kumta ki la kyntu ruh ïa ka sorkar ba kan thaw lad ha ka ban wan ai ïa ki kynja ai jinghikai ïa ki paidbah ha kaba ïadei bad ka jingthung ïa ki dieng jri (Rubber Plantation), shna Umsoh bad kiwei kiwei na ka bynta ban kyntiew ïa ka ïoh ka kot ka kamai kajih jong ki paitbah.
Ki la ong ba ki paidbah ki da kwah eh ba ka sorkar kan phah ruh ïa kiwei kiwei ki Officer jong ki tnad treikam, ba kin wan ban jurip ïa katei ka thaiñ ba kin tip kiei ki jingdonkam jong ki paidbah bad ba kin pynlong ruh ïa ki prokram ai jinghikai khnang ba kin nang kumno ban pyntrei kam.
Ki rangbah nongïalam shnong, ki la kyntu ïa ki Officer jong ki ar tylli ki tnad treikam kiba la wan jurip ïa katei ka thaiñ, ba kin pynkynmaw biang ïa ka sorkar halor ka jingwan jurip jong ki ïa katei ka thaiñ, khnang ba kan ïaleh ban thaw ki lad ki lynti na ka bynta ban kyntiew ïa ka ïoh ka kot bad ka kamai kajih jong ki paidbah.