Shillong, Jylliew 15 : Ki paid nongshong shnong Pnar kiba sah ha ka shnong Baikam kaba don mynta hapoh u pud u sam bad ka Assam ki kwah ba ha kane ka jingïapynbeit pud kin wan phai noh sha ka Meghalaya.
ïa kane ki la pynpaw ha ka jingïalang jongka Regional Committee ba la pynlong mynta ka sngi ha Holy Cross Secondary School,Umkiang East Jaintia Hills hapoh ka jingïalam u Chairman uba dei ruh u Symbud Myntri Rangbah u ma Sniawbhalang Dhar.
Ha kane ka jingïalang la ïadon lang ruh u Chief Executive Member (CEM) ka Jaintia Hills Autonomous District Council u ma Thombor Shiwat bad kumjuh ruh ïa ka kynhun na Assam la ïalam da u Nelamani Sen Dekka.
Ha kane ka jingïalang kaba la neh bun bun por ka jingïakren ka long beit halor ka jingïapynbeit ïa u pud u sam bad khamtam eh ha kaba ïadei bad katei ka shnong Baikam kaba sah da ki paid Pnar hynrei kaba hap mynta sha Assam.
Kumta namar kiba sah ki dei beit tang ki paid Pnar ki pynpaw ba ki kwah ban wanphai noh sha u pud u sam ka Meghalaya.
Halor kane na ka liang ki nongïalam ka sorkar Meghalaya bad ki nongïalam ka Assam ki la rai ban bishar bniah bha halor kane ka kam shwa ban shim ïa ka rai bad shwa ban pynbeit ïa u pud u sam hapdeng ki ar jylla.
