Shillong, Nailar : U MDC ka Mawlai u bah Teiborlang Pathaw ryngkat bad ki saw tylli ki dorbar shnong ha Mawlai, kiba kynthup ïa ka Mawiong Umjapung, Mawiongrim, Mawlai Nongkwar bad Mawlai Umthlong hynne ka sngi ki la ïakynduh ïa u myntri ba khmih ïa ka PHE u bah Renikton L Tongkhar ha ophis treikam jong u ban pynpaw ba ki kwah ïa ka um ka ban ring na Nongpathaw na ka bynta ka Jal Jeevan Mission (JJM).
Ka jingleit ïakynduh jongki hapoh ka jinglamkhmat u Bah Teiborlang bad ki Rangbah Shnong kiba kynthup ïa rangbah shnong Mawlai Nongkwar u bah Moonstar Rumnong, rangbah shnong Mawiong Umjapung bah Anthony Kharkongor, rangbah shnong Mawiongrim bah S. Lyngdoh Nongpiur bad u bah Tyllilang Myllliem Umlong, rangbah shnong Mawlai Umthlong ki la kyrpad ïa u bah Renikton ba un pynrung noh ïa ka Jal Jevan Mission hapoh ka shnong jong ki, ka ba dei ka Projek ban ring um man la ki thliew ïing na Nongpathaw.
Haba ai jingkren u bah Teibor u la pynkynmaw ba ïa ka jingleit ban khmih bniah ïa ka tyllong um ha Nongpathaw kaba khot ka Um Shyllong la dep jurip kham slem mynshuwa bad ïa ka Detailed Project Report ruh lah dep bad kaba sah ka long satang ban ïoh ïa ka mang tyngka (sanction).
Na ka liang u myntri sorkar u bah Renik ha kane ka sngi ula kyntu ïa ki Rangbah shnong ban ïa kitkhia ban pynbeit bad ki trai ka jaka ba dei ban buh ïa ki Pump bad ba un shimkhia ban pynrung ïa kane ka Project sam um ha ka JJM namar ka Mawlai mynta kala hap ha ka Rural Area, kaba mut ki la lah ban pyntrei ïa ki skhim bylla 100 sngi.
