Agartala, Ïaiong 19 : U Myntri ka tnad Tourism jongka sorkar Tripura, u Sushanta Chowdhury ha ka sngi Saitjain u la ong ba ka sorkar jylla ka la pynkhreh mynta ban wallam noh da ki seaplane lane ki liengsuin duriaw kyrpang na bynta ki nongwan jngohkai pyrthei ha Narkel Kumja bad ha Chhabimura ha Gomati District na ka bynta ban khring bad pynsuk ïa ki nongwan kai la kadei ïa kiba wan na ka ri bad kumjuh ruh na kiwei ki bynta jong ka pyrthei.
Ka Narikel Kunja kadei ka wah kaba heh bad ïar bha katba ïa ka Chhabimura pat la tip na bynta ka jingdon ki mawsiang ba ohshrong ha ki lum ba kiba kynjang kiba don ha ki rudwah jong ka wahbah Gomati.
“Na ka liang ka Tourism bad Transport Department jong ka sorkar jylla ki la shimkhia lang ïa kane ka sienjam ban wanrah da ka seaplane kiba lah ban ïaid halor um na ka bynta ban khring ïa ki nongwankai kiba dei na ka ri bad ruh kiba wan na shabar ri.
Mar ïa pyntreikam ïa kane ka sienjam, ki nongwan kai kin sa ïoh ïa ka lad ban ïohi ïa ka jingitynnad jong ka Nariket Kunja bad kumjuh ïa ka Chhabimura ha Gomati District,” ong u Myntri ha ka rynsan social media.
U Myntri u ong ruh ba ka kam jngohkai pyrthei da ki liengsuiñ duriaw ka dei ka bynta kaba khring ha ka kam jngohkai pyrthei ha kine ki sngi bad kan thaw ïa ka lad kaba thymmai na ka bynta ka kam jngohkai pyrthei jong ka jylla.
“Lada pyntreikam ïa kane ka sienjam kan wanrah ïa ka jinglong kham phylla bad thymmai na ka bynta ki nongwan kai bad khamtam eh kan kyntiew ïa ka ïoh ka kot jong ka thain,” u la ong.
U la ïathuh ruh ba u la dep ban shong jingïalang bad ki nongpynïaid ïa ki liengsuin duriaw lyngba ka video conference ha ka jingdon lang ki heh ophisar ban buddien bad wad bniah halor kane ka jingthrang jong ka sorkar jylla.
Dang shen ka sorkar jylla ka la soi ruh ïa ka Memorandum of Understanding (MoU) bad ka Tata Group’s Indian Hotels Ltd (IHL) ban pynkylla ïa ka Pushpabanta Palace ha Agartala sha ka hotel kaba heh ban khring ïa ki nongwan jngohkai.
La khmih lynti ruh ba ka Tata Group kan bei tyngka haduh kumba 250 klur tyngka ban shna haduh 100 tylli ki kamra ha katei ka jingtei kaba u riewkhraw ka ri u Rabindranath Tagore u sah ha katei ka jingwan jong u sha katei ka jylla.
