Kwah ka TMC ba ki kyrtong ba pan tiket MDC kin sngewthuh ïa jinglong ka sain pyrthei
Shillong, K’Lyngkot 10: U nongïalam ka liang pyrshah u Dr. Mukul Sangma, ha ka sngi Saitjain u la ong ba ka Trinamool Congress (TMC) kala khot aplikeshon ïa ki kyrtong ki ba kwah ban ïakhun ïa ka MDC election sha ka Garo Hills Autonomous District Council (GHADC) ka ban long mynta u snem.
U Sangma u la ong ba shwa ban ai tiket na ka party, ka long kaba kongsan ba baroh kin sngewthuh ïa ka “jinglong sain pyrthei” kaba mih hadien man la ka elekshon jong ka district council namar ka jingbym don jong ka Tenth Schedule (anti-defection law ne ka ain pyrshah ïa ka jingphet seng) ha ki autonomous district councils, ym kum ha ka ïing dorbar thawain.
“Ka aiñ pyrshah ïa ka jingphet seng kam treikam ïa ki dkhot jong ki autonomous district council, kumta ka la long kaba donkam bha ïa ki seng saiñpyrthei ban peit ïa ki briew (ki kyrtong) kiba ïadei bad ki nongrim ba kongsan ha ka mynsiem ba shisha ban ïasoh bad ka saiñpyrthei ban shakri ïa ki paidbah bad ban ïada ïa ki jingmyntoi jong ki,” ong u nongïalam ka liang pyrshah.
U la ong ba ka TMC kan don ka jingtrei kam kaba bniah bha ban pynduna ïa kum kine ki briew haba la ïohi ba ha ki por ba la dep bun ki dkhot ba la shah jied ki la kylla long ki lanot.
U Sangma u la pynpaw ïa ka jingsngewkhia ba ka jingshah khwai ka la nang “jur” ban ïa kaba mynshuwa kaba long ka jingsngewkhia na ka bynta uwei pa uwei u nongshong shnong jong ka jylla.
U la ong ba ha ka por ba u dang don ha ka bor ha ki por ba la leit, ka sorkar jong u kam ju pyrshang ban pynkhyllem ïa kino kino ki Executive Committee ha ki autonomous district council.
“…namar ngi bat skhem ïa ki nongrim ba kongsan jong ka synshar paidbah,” u la ong.
U Nongïalam ka Liang Pyrshah u la kylli ruh kumno lah ban shim, ki nongtrei jong ka GHADC ki lah ban treikam haba kim ïoh tulop la palat 43 bnai.
Haba ïa dei bad ka Article 275 (1) jong ka riti synshar ka ri, u Sangma u la ong ba, ka ai jingiarap na ka Consolidated Fund of India sha ki jylla kiba donkam jingiarap, khamtam na ka bynta ban kyntiew ïa ka bha ka miat bad ka roi ka par bad ka jingbha jong ki Scheduled Tribe.