Kwah ka Liang Pyrshah da ka jingïalang jong baroh ki seng Saiñ Pyrthei shwa ban pynkylla ïa ka kyndon 128 ka AD Rules

By Mawphor Editor On Mar 29, 2026

Shillong, Lber 27 : Ka Liang Pyrshah ha Khasi Hills Autonomous District Council (KHADC) ka la kyntu ïa ka Executive Committee ba ïalam da ka VPP ba kan khot pynlong ïa ka jingïalang bad baroh ki MDC hashwa ban khot ïa ka Dorbar Kyrpang ban pynkylla ïa ka Kyndon 128 jong ka AD Rules, bad ban pynshai ïa kaei kaba long ïa ka Bill 2018 kaba kwah ban bishar bniah ïa ka.
Haba kren sha ki nongthoh khubor ha ka sngi Thohdieng, u Nongïalam ka Liang Pyrshah u Bah Titosstarwell Chyne ula ong ba ka jingkulmar ha ri-lum Garo bad ka jingpynkylla ka GHADC ïa ka Rule ba khang ïa ki bar jylla ban ïashim bynta ha ka elekshon ka Council ka la pynlong ïa ka KHADC ba kan leh eiei-tangba kan long hadien ka jingïasyllok lang.
“Ngim ong ba ka amendment ka dei ban long kajuh kum ka GHADC” ula ong haba bynrap “Lada phi ong Scheduled Tribe, ki don bun ki riewlum ba la ithuh kum ki ST hapoh ka Order 1950. Kaba ngi ong KHADC, ka dei ban long beit thik tang ïa ka Jaidbynriew Khasi”.
U Bah Titos ula ïathuh ba ka amendment bill 2018, ba la mynjur da u (L) Bah HS Shylla kum u CEM, ka la ïaid kham palat ïa ka rule 128 ban pynkylla kyrteng ïa ka Rules sha ka Khasi Hills Autonomous District Rules, da kaba weng noh ïa ka kyntien ‘Assam” na ka aiñ u snem 1950.
“Ka AD Rules ka long kumjuh ïa baroh lai tylli ki ADC. Ngi tyrwa ba man ki Council ki dei ban don la ki jong ki Rules” ula ong haba bynrap ba ka jingpynkylla dang shen jong ka GHADC ka la dep ïoh ïa ka jingmynjur na u Lat ka Jylla.
U ïathuh ba ïa ka Bill 2018 lah dep ban phah sha ka Tnad District Council Affairs bad ka Expert Committee, kaba la buh ïa 11 tylli ki jingkylli kiba ka KHADC ka la dep pynshai ha katei ka por.
Namar ka Bill ka dang sahteng, ka ïingdorbar kam lah ban wanrah ïa ka bill thymmai satang da ka phah pynphai shuwa ïa kaba mynshwa ba kan bishar kham bha lane wanrah da ka bill kaba long da kumwei pat.
U Bah Titos ula ïathuh ba ka KHADC ka la dawa ïa ka amendment ïa ka Rule 128 hynrei ka donkam ïa ka jingmynjur lang baroh.
“Kane kam dei ka jingmyntoi shimet hynrei ka jingmyntoi jong ka Council bad ka Jaidbynriew trai muluk” ula ong haba pynrem ïa u CEM ka VPP namar ka jingbym treh ïakynduh ïa ka Liang Pyrshah wat haba lah phah ktien.