Kwah ka HYC ban tei da ka Cultural Centre ha Khyndai Lad ban pynneh ïa ki Riti ki Dustur

Shillong, Kyllalyngkot 28 : Ka Hynniewtrep Youth Council (HYC) ka la dawa ïa ka Sorkar Jylla ban tei ïa ka Cultural Centre ba kyrpang ha Khyndailad, Shillong, ban pynneh pynsah ïa ka kyrteng ba sah khana bad ka pateng jong kane ka jaka bad kumjuh ruh ban pynneh pynsah ïa ki Riti ki Dustur
Ha ka shithi sha u Myntri Rangbah Conrad K Sangma bad Symbud Myntri Rangbah ba khmih ïa ka Tnad Urban Affairs Bah Sniawbhalang Dhar ha ka sngi Balang, u President ka HYC Bah Roy Kupar Synrem ula ong “ Ka Khyndailad ka donhok ban sah jingkynmaw ym ka kyrteng ban klet noh, hynrei kum ka dak baim jong ka pateng u Khasi hapdeng eh ka Shillong,ngi kyrpad jur ïa u Myntri Rangbah bad Symbud Myntri Rangbah ba khmih ïa a Tnad Urban Affairs, ba kin mynjur lang ïa kane ka jingdawa bad bthah ïa ki tnad ba dei khmih ba kin pynlong ïa ka jingwadbniah bad sdang ïa ka project ha ryngkat ka jingïasyllok bad ki Dorbar Shnong lem bad ki seng bapher bapher”.
“Kane ka Centre kan ai bun ki jingshakri, kynthup ka jingpynneh pynsah ïa ka jinglong tynrai, ban kyntiew ïa ki artist trai shnong, ka sengkam sengjam bad ka jngohkai pyrthei kaba neh” ula bynrap.
Ka Centre kan don ïa ki jaka madan ban pynlong ïa ki tamasa pynbyrngia, ki dukan na ka bynta ki jingbam tynrai bad tiar shna hi, bad ki jingwah ïa ki jingthoh kiba batai ïa ka khana pateng jong ka Khyndailad.
Ka HYC ka ngeit ba kane ka sienjam kan ai burom ïa ka mynnor, ka thaw ïa ki lad kamai jakpoh, bad pynrung ïa ka jingsngew sarong hapdeng ki paidbah.