Kut noh kawei na ki jingïakhih ba jrong tam ha jylla, leit phai ïing ki nongtrei SSA

Shillong, Nailar 20: Hadien 21 sngi bad 20 miet ka jingshong ïakhih bad sahmiet ha Madan Malki, ki nongtrei Non Teaching jong ka bor treikam SSA, mynta ka sngi ki la pynkut bad weng noh artad ïa ka jingïakhih jong ki.
Ka President jong ka All Meghalaya Non Teaching Staffs Association, ka Kong Jennyfer Synrem, ka la ïathuh ba ka Sorkar ka la ai da ka jingthoh ban pyntreikam noh ïa ka increment ba 2 percent katkum ka Seniority bad ka annual increment ba 5 percent man la ka snem.
Ha kaba ïadei bad ka jingpynkiew tulop ba 80 percent na ka liang ka sorkar kam shym la mynjur, tangba ka Seng ka hun noh namar ba ka sorkar ka la pyntreikam da ka Base Pay kumba long ka Basic Pay ki nongtrei sorkar, ha kaba don ka jingpynbeit ryntih ïa ka tulop naduh na State haduh ki District Level haduh ki Block Level, khnang ba ka jingsiew kan nym long kumjuh ïa ki nongtrei kiba dang shu tei mynta bad kiba la trei 16 snem.
“Ïa kane yn leh da ka Rationalisation Committee ba ka thung da ka Sorkar”, la ong ka Kong Jennyfer.
Haba kren bad ki lad pathai khubor, ka Kong Jennyfer Synrem ka la ong ba hadien ka jingïakynduh ba bunsien bad ki nongïalam sorkar bad ha kaba ka sorkar ka la thaw ruh da ka Rationalization Committee ba la khlieh da u Vijay Kumar ban peit ïa kane ka jingdawa kaba ki buh na ka liang ka association.
Ka la ong ba namar ba ki mat jingdawa jong ki, ki la ïoh jingkular da ka jingthoh ban pynurlong na kata ka daw la rai ban weng ïa kane ka jingïakhih.