SHILLONG, Naitung 14: Ki 3 tylli ki Selection Trial jong ka Meghalaya Athletic Association [MAA] ban jied ïa ki nongïalehkai kiba kynsai ka la poi sha kaba kut hadien ka Selection Trial kaba khatduh kaba la long ha Tura. ïa kane ka trial kaba khatduh la pynïaid da u Bah Pleasantly Synnah, Joint Secretary jong ka MAA.
Kane ka Selection Trial kaba dei na ka bynta ki nongïalehkai kiba hap ha ka Garo Hills District la pynlong ha Pa Togan Nengminja Athletics Stadium ha ka 12 tarik Naitung, 2025. Ki don haduh 429 ngut ki nongïashim bynta kiba la wanpoi ha kane ka jingpyrshang jied nongïalehkai, napdeng kine 86 ngut ki dei ki kynthei bad 343 ngut ki shynrang.
Ki don 27 ngut ki Technical Official kiba kynthup ïa ki dkhot jong ka Meghalaya Athletics Association kiba la ïarap ban khmih ïa kane ka Trial.
Na ka liang jong u Saljagrin Marak – District Sports Officer jong ka West Garo Hills uba long ruh u Vice President jong ka Meghalaya Athletics Association, u la ai mynsiem bad pynshai ïa ki nongïalehkai ha kaba ïadei bad ka jingpynkhreh ïa ka kynhun bad u la ai ruh ka jingkular kaba ai mynsiem ïa kino kino ki nongïalehkai Garo kiba ïakhun ha ka Athletics ba un sa pynkup burom ïa ki da ka Scooty lada ki lah ban jop takma ha ka National Games kaba 39 ka ban sa long ha Meghalaya.
Katba u Bah Patrick Lamare, Joint Secretary jong ka Meghalaya Athletics Association u la ai ka jingkhublei kaba kyrpang ïa ka Sorkar Jylla Meghalaya na ka bynta ka jingkyrshan kaba khlem sangeh ha ka ban ïarap kyntiew ïa baroh ki synjuk ïalehkai jong ka Jylla.
Related Posts
U la ai khublei ruh ïa baroh ki Technical Officials bad nongïalehkai kiba la rangbah na ki lai tylli ki 3 tylli ki jaka ba la pynlong ïa kine ki Trials, kata ha Jowai, Shillong bad Tura kiba la ïarap ban pynlong ïa kane ka Selection Programme kaba jop bad ruh ban ai mynsiem ïa ki nongïalehkai ba kin shim khia bha ïa kane ka kabu ban pyni ïa ka sap ka phong jong ki khnang ba ka Jylla kan ïoh ban khur bun tylli ki takma ha ka National Games ka ban wan.
Da kane, ki 3 tylli ki Selection Trial jong ka Meghalaya Athletics Association na ka bynta ka Kylla (Phase) kaba nyngkong ka la poi sha kaba kut. Baroh ki nongïalehkai kiba la ïashim bynta ki long haduh 877 ngut, kynthup ïa 190 kynthei bad 687 ngut ki shynrang.
Ka Meghalaya Athletics Association mynta kan don ïa ka Selection Committee Meeting ha kine ki ar lai sngi ban wan ban bishar bñiah bad jied ïa ki nongïalehkai kiba kynsai tam na ki lai tylli ki Selection Trial ban long shi bynta jong ka Kynhun Pynkhreh (Team Preparation) na ka bynta ka 39th National Games.
ïa ka thup kyrteng jong ki nongïalehkai kiba la shah jied yn sa pynbna shen ynda ka Selction Committee ka la shim ïa ka rai kaba khatduh.
Kane ka long katkum ka kyrwoh na u General Secretary ka Meghalaya Athletics Association, u Bah Finely L Pariat, ha kaba ïadei bad ka jingpynkhreh jong ka Jylla ban jied ïa ka kynhun ïalehkai ban pynkhreh ïa ka Nationals Games ka ban wan.