Mairang, Naitung, 3: Ka Eastern West Khasi Hills District Level Inter-School Subroto Mukherjee Cup Football Tournament 2022 kaba la pynlong da ka ophis jong ka District Sports Officer West Khasi Hills District Nongstoiñ, ïa kaba la sdang ha ka 23 tarik u Jylliew 2022, ka la kut noh ha ka sngi saitjaiñ ha madan Dommawlum Pyndengumiong, Mairang.
Ha ka jingïalehkai phainal jong ki khynnah kynthei kiba hapoh 14 snem, ka Tiehnongbah Government Upper Primary School, ka la jop ïa ka Mairang Presbyterian Higher Secondary School da lai kol la kawei lyngba ka jingïashut tie breaker.
Katba, ha ka jingïakhun phainal jong ki khynnah shynrang kiba hapoh 14 snem, ka Little Star English Medium Secondary School, ka la ïoh rah ïa ka nam lahduh da kaba pynliem ïa ka Mairang Presbyterian Higher Secondary School da ar kol la nod (2-0).
Ka Little Star English Medium Secondary School ka la mad nam jop ruh ïa ka phaiñal jong ki khynnah shynrang kiba hapoh 17 snem, da kaba jop pyrshah ïa ka Mairang Presbyterian Higher Secondary School da shi kol la nod.
Ïa ka prokram pynkut jong kane ka tournament la wan ban sakhi da u Myntri ka tnad Water Resources ka jylla, u ba long ruh u MLA ka Mawthadraishan u Bah H.B Nongsiej, ha ryngkat ka jingïadonlang u Additional Deputy Commissioner ka Eastern West Khasi Hills District, u Bah A. Nongbri, I District Sports Officer ka West Khasi Hills District, I Kong B. Syiem, ki Principal jong ki skul ka thaiñ, ki nongïalam shnong bad kiwei de.
