Nongpoh, Jymmang 07: Ban sei madan ïa ki sap ki phong jong ki nongrep bad ki khun ki kti jongki ha ka kam ïalehkai phutbol, ka Abani, ka kynhun trei mon sngewbha ban kyrshan ïaki nongrep bad ryngkat ka jingïatreilang bad ka Red Horns Division, ka FOCUS, Ka Infinite Solutions bad ka Out There Public Engagement ki la pynlong ïa ka lympung ïalehkai phutbol ha ka shnong Marngar ba la tip kum ka Farmers’s World Cup 2022 naduh ka 30 tarik u Lber bad mynta ka sngi ki la lah ban pynhap pyrda noh ïa kane ka jingïalehkai da kaba sam ruh ïa ki khusnam sha ki kynhun nongjop.
Haba ïa khun ïa ka thup jong ka phainal, ka liang jong ki kynthei ka Marngar Women’s Team ka la ïakhun pyrshah ïaka South Garo Hills bad haka jingïalehkai jong ki shynrang pat ka Marngar Men Team ka la ïakhun pyrshah ïaka West Garo Hill.
Kane ka jingïaaireng kine ki kynhun kynthup ki shynrang bad ki kynthie wat hapdeng ka jingpynthud u slap ki la sei la ki sap ki phong ban pynjop ïa la ka kynhun na ka bynta ban ioh khur ïa ka nam jop bad haba ïa knieh ïa ka nam jop na kaliang jong ki kynthei ka West Garo Hills ka la Lah noh ban pynliem ïaka Marngar women Team 2 da 1-0, bad ha ka jingïakhun jong ki shynrang ka Marngar Men Team 2 ka la Lah ban pynliem noh ïaka East Garo Hills da 3-0.
Kum ban pynpaw paidbah, la pynlong ruh ïa kane ka lympung ïalehkai jong ki nongrep, ka dei shi bynta ban rakhe ïa ki jingnoh synñiang ki nongrep sha ka imlang ka sahlang lyngba ka kam rep ka kam riang bad ki don haduh 12 tylli ki kynhun kiba la wan ban shim bynta na kylleng ka jylla Meghalaya bad kyntup ruh na Rilum Khasi bad na Ri Lum Garo.
Haba pynkut noh ïa kane ka Farmers World Cup 2022, la wan ruh ban sakhi da ka jingdon lang u Major General S. Murugesan, General Officer Commanding Red Horn s Division, u MLA ka Nongpoh Constituency Bah Mayralborn Syiem, Conel P P Sharma, Commanding Officer 1st Assam Regiment, Brigadier T. S Hothi, Previous Commanding, Spear head Brigade, Brigadier K. M Shinde, Shaurya Chakra Commander, Spearhead Brigade.
Kumba la pynpaw da u Bah Kit Shangpliang bad u Samla Arku Nongrum kiba dei ki nongpynïaid kane ka lympung, ki la ong ba ka jingthmu ba kyrpang kane ka lympung ïalehkai phutbol ki nongrep ka long ban wan rah ïa ka mynsiem shi paralok, ka jingïatylli bad ka jingïatrei lang hadpeng ki Nongrep bad shuh shuh kum ki nongpynïaid ki don ruh ka jingkyrmen b akum kane ka lympung kin dang lah ban pynlong ha ki snem ban sa wan na ka bynta ban kyntiew ïa ki nongrep.
