Shillong, Nailur 24 : Ka jingïaid lynti jong ka kynhun ki thei ïalehkai phutbol U-17 jong ka Ïewrynghep Secondary School kaba la mihkhmat ïa ka jylla Meghalaya ha ka Subroto Mukherjee Cup 2022 ka la poi noh sha kaba kut hadien ba ka la rem da 2-0 kol hakhmat ki thei ka CSSS Alakhpura Bhiwani, Haryana ha ka jingïalehkai quarter-final ha ka janmiet jong ka sngi Thohdieng ha SPFG.
Ha katei ka jingïalehkai, ki thei ka jylla ki la lah ban ïalehkai bha kumjuh long ha ki laisien ïalehkai hynrei sniewbok ha kane ka sngi ba kim lah pat ban pyndep ha ka liang ka thep kol.
Ka Meghalaya ka don ha ka kyrdan kaba nyngkong na ka Pool F hadien ba ka la jop ha baroh ki laisien ïalehkai kiba lah dep ha kaba nyngkong ki la pynliem da 3-0 pyrshah ïa ka Mizoram kaba la ïalehkai ha ka 19 tarik Nailur, 14-0 kol pyrshah ïa ka IPSC bad da 4-0 kol ïa ka Chandigarh ha ka sngi Balang mynta ka taïew.
Ka Roman Catholic Evening School, Mihmyntdu kaba mihkhmat ïa ka jylla Meghalaya ha ka kyrdan U-14 jong ki khynnah shynrang ka la rem noh ha ka quarterfinal ha ka jingïalehkai kaba la long ha ka 11 tarik Nailur 2022.
