Shillong, Nohprah 11 : Ka jingap khmih lynti jong ka England ban ïoh rah ïa ka World Cup 2022 ha Qatar ka la poi noh sha kaba kut hadien ba ka la rem noh da 1-2 kol ha ka France ha ka jingïalehkai quarterfinal ha ka sngi U Blei ha Al Bayt Stadium.
Haduh mynta ka England ka la mad nam rem noh hynñiew sien tang ha ka jingïalehkai quarterfinal ha ka World Cup kata ha u 1962 ha Chile, 1970 ha Mexico, 1982 ha Spain, 1986 ha Mexico, 2002 ha South Korea bad Japans, 2006 ha Germany bad mynta u 2022 ha Qatar.
Haba phai sha ka jingïalehkai quarterfinal hapdeng kitei ki ar tylli ki radbah jong ka dewbah Europe, ka jingïalehkai ka long kaba mar ïabiang bor bad ïakhaid bha, hynrei dei ka France kaba dang bat nam lahduh ka la ïoh ban plie pyrda nyngkong ha ka jingïalehkai ba la ïaid 17 minit ba la thep da u Aurelien Tchouameni bad ka la ïoh ban lamkhmat da 1-0 kol ha kaba kut jong ka kylla step.
Haba wanphai sha ka kylla miet, baroh ar ki kynhun ki la ïakhun tyngeh bad ka England ka la ïoh ka kabu ban pynphai kylla ïa katei ka shi kol hadien ba u Saka u la shah pynur jubor hapoh box. Bad ïa katei ka penalty u Harry Kane uba la wan ban bahkhieh khlem da pynsep ei u la pynrung suk ïa ka bol shapoh ka jar.
Lyngba katei ka jingïathep ba mar shi kol ka jingïalehkai ka la nang ïakhluit ha baroh arliang khamtam ha ka jingïapyrshang thep kol, hynrei dei ka France kaba la ïoh ban pynphai kylla ha ka minit ïalehkai ba 78 lyngba u Olivier Giroud uba la sangah da ka khlieh ban pyntam thep kol da 2-1 kol.
Ka England ruh khlem da ailad ka la ñion sha ka kut jong ka France ha kaba ka la ïoh biang sa kawei ka kabu ban pynphai kol lyngba ka penalty, hynrei ha ka sien kaba ar u Harry Kane uba dei ruh u kapten jong ka kynhun uba la wan ban shimti ïa ka jingshut penalty u khlem lah ban pynurlong ha kaba ka bol ba u la khyrwit ka la tam palat ïa u dieng kol.
Ka France ka la nang pynskhem shuh shuh ïa ka kut jong ka ha kaba ka la lah ban khanglad ïa ki katto katne ki jingpyrshang thep kol bad pynkut syndon ïa ka jingap khmih lynti jong ka England ban ïoh rah nam lahduh ha kane ka World Cup.
Lyngba katei ka nam jop, ka France mynta kan pynkhreh pat ban aireng pyrshah ïa ka Morocco ha ka jingïakhun semifinal kaban long ha ka 15 tarik Nohprah ha ka por 12:30 am.
