Kut noh ka ‘District Level Horticulture Exhibition’ ba ar sngi ba la pynlong da ka ophis DHO, EJH

Khliehriat, Nohprah :Ia ka ‘District Level Horticulture Exhibition’ ba ar sngi kynthih ba la pynlong da ka District Horticulture Officer (DHO), East Jaiñtia Hills District halor ki jingthung jingtep kiba hap hapoh ka Mission for Integrated Development of Horticulture (MIDH)-2024–25 bad Spice Development Scheme (2024–25) kaba la sdang ha ka 16 tarik ka la kut noh hynne ka sngi 17 tarik Nohprah ha Wika Complex, Khliehriat West, EJHD.
Ha kane ka prokram la wan iashim bynta da u Director ka Tnad ka rep ka riang ka sorkar Jylla, u Bah Shanbha Rani nalor kiwei kiwei.
Haba kren ha ka jingialang, u Director Bah Shanbha Rani u la iaroh ïa ka jingithuh ia u Shynrai Lakadong (Lakadong Turmeric) bad u la kyntu ïa ki nongrep ba kin nangpyniar shuh shuh ia ka jingrep shynrang. U la kdew ruh ïa u Sohñiamtra kum uwei na ki mar rep uba ai jingmyntoi shibun ïa ki paid nongrep bad pynshlur ban pyniar ïa ka jingrep ïa une u jait soh.
Haba pynksan ia ka jinglah ban shaniah halade, u la aijingmut ruh ïa ki nongrep ba kin seng ïa la ki jong ki nursery na ka bynta ki soh, ki jhur bad ki jait jingshoh ne spices.
U la pynpaw ruh ba ka jingrep syntiew ka la nangkiew sted ha ki thaiñ nongkyndong bad u pynshlur ïa ki nongrep ba shim ïa ka kum shibynta jong ka rukom rep ba thikna.
Haba ban jur halor ka jingdonkam ïa ka pule puthi, u kyntu ïa ki nongrep ba kin pynshlur ïa la ki jong ki khun ki kti ba kin kiew ha ka jingnang jingstad khnang ba ki jingnang jingtip bad ki rukom rep kin ïai bteng pateng la pateng.
Haba pynpaw ïa ka jinglah ban pyniaid ïa ka dor ka mur, u la ban jur halor ka jingdonkam ïa ki jaka pynmih marbam ban kyntiew ïa ka ioh ka kot jong ki nongrep ha ka jaka ban shu die ïa ki kamr rep ha ka dur ha ka rukom kiba ki long.
U Director u pynshlur ruh ïa ki nongrep ba kin pyrshang ïa ka rep Tit, khamtam u Tit Shiitake uba jur bha ka jingdawa ha ki iew ki hat, bad u la aijingmut ruh ïa ki ba kin leit mih sha ka ophis jong ka District Horticulture ban ioh ïa ka jingbtin lynti.
Nalor kata u Bah Rani u la kren ruh halor ka jingdonkam jong ka rep ba khlem pyndonkam dawai ne organic kaba ka sorkar Meghalaya ka pynshlur ïa ki nongrep ba kin pyrshang da kaba pyntip ruh ha ka jingialang halor ki jingktah kiba mih na ki jingai dawai ïa ki mar rep ïa ka met jong u briew.
Kiwei pat kiba la aijingkren ha kane ka sngi ki kynthup ka District Horticulture Officer (DHO), EJH, Kong Labarimai L Syiem kaba la ai khublei kyrpang ïa ki nongrep kiba la wan ïa shim bynta kaba la pynlong ïa kane ka jingpyni mar rep kaba seisoh.
Kiwei pat kiba la aijingkren ki kynthup ïa u Assistant Director Horticulture, Marketing, EJH Bah Dodo Pasweth, District Agriculture Officer (DAO), EJH, Kong Luciana Lakiang Horticulture Development Officer (HDO), Wapung C&RD Block bad u Bah Ebenezer Gympad.
Ki mar rep ba la pyni paidbah ha kane ka sngi ki kynthup naduh ki jhur ki jhep, ki jait jingshoh, ki syntiew, ki soh, tit bad kiwei kiwei.
Hadien ka prokram la sam ruh ïa ki prize sha ki nongjop ha ki kyrdan bapher bapher.