Shillong, Jymmang 29: Ka 3rd YAI North East Regatta 2025 ka la poi sha kaba kut hynne ka sngi Palei ryngkat ki nongïashim bynta kiba pyni ïa ka jingtbit jong ki ban kieng lieng ha pung Umiam. Wat hapdeng ka jinglong jingman ka suiñbneng kaba pynthut, katei ka lympung kaba san sngi ka la sakhi ïa ka jingkut jingmut bad ka jingïashim bynta shit rhem jong ki nongkieng lieng.
Kane ka jingïakop kieng lieng ‘Regatta’ ba la pynlong da ka Umiam Sailing Club (USC) bad ka UDAY Sailing Foundation ha ryngkat ka jingïatreilang bad ka International 420 Class Association of India, hapoh ka jingpeit jong ka Yachting Association of India (YAI) bad la kyrshan da ka tnad jngohkai pyrthei jong ka Sorkar Jylla Meghalaya, ka don palat 81 ngut ki nongïashim bynta na ki 9 tylli ki sailing club ba pawnam ha kylleng ka ri India, kynthup ïa 25 ngut ki khynnah kynthei bad 09 ngut kiba dang shu sdang.
Haba ai jingkren ha ka jingïalang kum u Kongsan, u Bah Paul Lyngdoh-Myntri ka tnad jngohkai pyrthei, u la ai khublei ïa ki nongïakop kieng lieng, ïa ka kynhun pynïaid bad ïa ki dkhot jong ka Uday Sailing Foundation. U la kdew ba kane ka lympung ka nang kiew man la u snem da kaba khring shuh shuh ïa kiba wan ïashim bynta. Haba kren ïa ka jingkiew ha ka liang ka teknoloji, u Bah Paul u la ong, “Ha ka sien kaba nyngkong, Ngi la pyni live ïa kane ka lympung baroh kawei, kaba ailad ïa ki kmie ki kpa ban tip ïa ka jingïalehkai jong ki khun na jngai.”
Haba kren shaphang katei ka jaka, ula ong, “Ngi long kiba donbok ban don ïa kawei na ki pung kiba itynnad tam ha ka pyrthei hangne hi”. U la bynrap ba ki jingdonkam ha kylleng sawdong ka pung la nang pynbha shuh shuh.
Related Posts
U la pynbna ruh ïa ka jingthmu ban bei tyngka kaba kongsan kaba palat T.100 klur ka dang ïaid shakhmat ban pynbit pynbiang bad pynbha ïa ki jingdonkam, kynthup ïa ka jingtyrwa ‘Lake Cruise’ (ban ïalam kai sawdong ïa ka pung na bynta ki nongshang pyrthei da ka lieng).
“Ngi khmih lynti ban pdiang sngewbha ïa phi baroh ha u snem ban wan ryngkat bad kine ki jingpynbha ïa ka jaka,” la bynrap u Bah Paul.
Ki khusnam ba kham paw ba la sam ha kane ka sngi ki long ïa ka Most Promising Sailor ba la khur da u Doaydy T Sangma jong ka Umiam Sailing Club (USC), nangta ka National Sailing School (NSS), Bhopal, ka la jop ïa ka Best Sailing Club Award da kaba khur 10 tylli ki takma. U Shashank Batham (NSS) u la khur ïa ka Col Jaggi Trophy na bynta ki 7 tylli ki hit (gun) ba u la ïoh ha ka ILA 6 category competition.
Kaba kham pawnam ka long ba ka Umiam Sailing Club (USC), tang hapoh lai snem naduh ba la seng ïa ka, ka la wan ba lai kum ka kynhun kaba heh tam na ka bynta ka 3rd Yachting Association of India (YAI) Regatta ha u snem 2025.
Ka sien pynlong kaba lai jong ka Regatta ka la long ka sienjam kaba kongsan da ka tnad jngohkai pyrthei sha ka jingpynïadei ïa ka mariang bad ki lad kamai.