Nongtalang, Naiwieng 21: Ka 1st Badminton Tournament 2025 bala pynïaid da ka Seng Samla Khlachympa Sports and Cultural Club Nongtalang, ba la pynlong hapoh hall-cum indoor sports jong ka Nongtalang Khlachympa, mynta ka janmiet kala poi sha kaba kut ha ka jingïalehkai hapdeng ka Poophang Team na Sohkha Mission pyrshah ïa ka Phiba Team na Nongtalang ha kaba ka Poophang Team ka la pynliem ïa ka Phiba Team da 21-14, 19-21, 21-12.
U kongsan mynta ka janmiet u dei u Bah Ferdinand Mukhim bad u bat ruh ïa ka kam kum u General Secretary jong ka Nongtalang Khlachympa.
Ka Poophang Team kaba dei ka nongjop mynta ka janmiet kala ïoh khur ïaka song pisa kaba Rs.13,000/- (khadlai hajar) tyngka ryngkat ka trophy, katba ka Phiba Team kaba shah rem pat kala ïoh Rs.7000/- (hynn¨iew hajar) tyngka ryngkat ka trophy.
Ka jingthmu jong ka jingpynlong ïa kane ka jingïalehkai Badminton Tournament 2025 ka long ban pynmih fund na ka bynta ka Seng Samla Khlachympa Sports and Cultural Club bad ban pyni ruh ïa ka sap ka phong kaba ki Samla jong ka thaiñ ki don.
Kane ka Badminton tournament la pynïaleh tang da ka double.
Ki nongshim bynta ha kane ka tournament ki long Nongtalang, Amlarem, Muktapur, Dawki, Darrang, Sohkha Shnong, Sohkha Mission bad Lamin bad ka long kaba ïaid beit ïaid ryntih naduh ba sdang haduh ban poi sha ka sngi pynkut.
Ka Poophang Team (Sohkha Mission) ka la poi sha ka final da kaba pynliem ïaka Brinal Team (Nongtalang) katba ka Phiba Team (Nongtalang) ka la poi sha ka final da kaba pynliem ïaka Dawki PHC Team
Kyrmen ba ha ka 2nd Badminton tournament 2026 kan long kaba kham heh bad itynnad, shuh shuh la pynpaw ki nongpyniaid jong kane ka Tournament.
