Kut ka shad ñiam ‘Behdieñkhlam’ ka SRJ hapdeng ka jingiphung iphieng, wan sakhi da ki hajar ngut

Jowai, Naitung 14: Ka Shad ñiam Behdieñkhlam jong ka Seiñ Raij Jowai kaba ju long shisien shisnem mynta ka sngi nyngkong kala poi noh sha kaba kut, hapdeng ka jingiphuh iphieng bala shim bynta ki khun ka Seiñ Raij ha ryngkat ka shad ka kmen bad ka put ka tem.

Baroh ki rong ki rup (rot) kiba la wan pynpoi mynta ka sngi hapoh ka ‘Syiem Aitnar’ kila don haduh 13 tylli, ïa kiba la shna kyrpang da ki dong bapher bapher hapoh ki Kmai Raij kumjuh na ka Seiñ Ummulong, na ka Seng Khasi Seiñ Raij Shillong nalor kiwei de.

“Kine ki rot kiba la wanrah ki don la ki jong ki jong ki khubor naduh ki rukom ban ïada ïaka mei mariang ban lait na ki jingjaboh, ki jingsniew kiba ngoh ha ki bor jong ka juk stad Technology, ban lait na ka jingshah thombor, ka khubor jong ka ‘Operation Sindoor’ ka Ri India pyrshah ïaka Pakistan bad kiwei de ki khubor jingsneng kyntu ïa ka imlang ka sahlang.

Ïa kane ka shad ñiam Behdieñkhlam kaba ki khot ka ‘saw sngi lai miet’ la sdang ïaka naduh ka 11 tarik u Naitung bad pynkut mynta ka sngi (Muchai) 14 tarik u Naitung, 2025 ha kaba la pyndep ïa ki jinglehñiam naduh ka nguh ka dem, ka suit ka shor, ka jingpyndep ïaka Siang ka Pha, ka jingleit rah ïa ka Symbood Khnong, ka Khnong Blai, ki Deiñkhlam, ka bam tyngkong, bad kiwei de ki kam ñiam kam rukom ba la pyndep da u Dolloi ka Elaka Jowai, u Langdoh, u Pator bad ki Waheh Wasan.

Ha kane ka sngi pynkut ïa ka Behdieñkhlam (Muchai) la wan ban sakhi lang da ki symbud myntri rangbah ka sorkar jylla u ma Sniawbhalang Dhar, ki MLA ba kynthup ïaka kong Mazel Ampareen Lyngdoh, ma Kyrmen Shylla, ma Shanbor Shullai, ma Wailadmiki Shylla, MP ka Rajay Sabha u Dr. Wanweiroy Kharlukhi, ki MDC, u Deputy Commissioner ka WJHD u Abhinav Kumar Singh, IAS, u SP  WJHD Jagpal Singh Dhanoa, IPS, ki ophisar sorkar ryngkat ka jingdonlang u President ka Seiñraij Jowai ma H. Toi, u General Secretary ma A. Sumer nalor kiwei de.

Na ka liang ki nongïalam ka Seiñraij Jowai ki la pynpaw ka jingsngewnguh ïa baroh kiba don bynta ha kane ka lehñiam naduh ba sdang tad haduh bakut jong kane ka sngi, ha kaba la lah ban pyndep ïa ki ñiam ki dustur jong u longshwa manshwa bad kane ka Behdieñkhlam kala long kaba jop.

U President ka SRJ kane ka lehñiam Behdieñkhlam haka jingkren pdiang sngewbha ula pynpaw ka jingai khublei ïa baroh kiba la wan ban shakhi ïa kane ka sngi, ula ai ruh ka kitbok kitrwaing da kaba kyntu ban long kiba tip briew tip blei bad ban pynskhem shuh shuh ïa ka jingïadei shikur shijait. Ula pynpaw ka jingsngewnguh ïa ka sorkar kaba la ai jingïarap haduh 20 lak tyngka lyngba ka tnad Tourism, 6 lak tyngka lyngba ka Art & Culture bad na kiwei de ki tnad.

Katba na ka liang u kongsan jong kane ka sngi u ma Sniawbhalang Dhar haba ai jingkren ula ai khublei ïa ki khun ka Raij kiba la duh thiah duh dum ban pyndep ïa kane ka lehñiam, ula ong ‘kane ka jingwan sakhi lang jong baroh mynta ka sngi ka dei ka jingtyllilang jong kiwei de ki para jait ñiam hapoh ka Jylla’. Shuh shuh ula ong ka jingiphuh iphieng jong kane ka ‘Aitnar’ ka dei lyngba ka jingïatreilang jong ka sorkor hapoh ka jingïalam jong u Myntri Rangbah ban ïarap pisa haka ban pynshna ïa kane ka jaka kaba itynnad.

Haba phai sha ka lehñiam ba khadduh jong kane ka Behdieñkhlam mynta ka sngi naduh ka por mynstep ka la don ka Bam Tyngkong ha ïing Langdoh, ka kynting khnong ka Loompyrdi ha ïung Langdoh, ka Sympat ïung, katba haka por nongphai sngi kaba dei ka bynta ba kongsan jong ka lehñiam la pynhiar ïa ka Deiñkhlam, ka Kymbood Khnong, ka Khnong Blai bad ki rong ki rup kiba don 13 tylli la pynpoi ha pung ka Syiem Aitnar da ka jingsakhi lang jong ki hajar ngut ki nongwan peitkai kiba na kylleng ki jaka.

Katba ha ka por janmiet la don ka Datlawakor hapdeng u Langdoh bad u Sangot Paswet ha ka jingïaleh ka kynhun u Langdoh kala long ka nongjop kaba mut ba u kba u khaw un khambha sha ka thaiñ Pynthor Wah mynta ka snem.