Kut ka ‘Seminar Cum Jingïaseng ïalap’ ba ar sngika Mission & Evangelism Committee JS KJP Synod Mihngi ha ka Balang Mosiang

Jowai, Nailur 12: Ka ‘Seminar Cum Jingïaseng Ïalap’ jong ka Mission & Evangelism Committee Jingïaseng Samla Khasi Jaiñtia Presbyterian (KJP) Synod Mihngi kaba ar sngi lynter kaba la sdang naduh ka sngi saitjaiñ 10 tarik bad pynkut ha kane ka sngi U Blei haka Balang Presbyterian Mosiang Lamare Rim, Chiehruphi District, Narpuh Border Presbytery.
Ha kane ka ‘Seminar Cum Jingïaseng Ïalap la wan ban ïa shim bynta da ki Dkhot bad Delegate naka kylleng ki Presbytery jong ka KJP Synod Mihngi bad ki parabangeit jong katei ka Balang. Ha ka sngi saitjaiñ kala don ka jingai jinghikai halor ka ‘Jingtrei Mission ki samla ha ki juk ba mynta’ ba la ai jingbatai bniah da u T.Bn. A.S Majaw ha kaba ula pynbynta ha ki ar Session I & II. Katba ha ka por 7 baje janmiet kala don ka Jingïaseng Ïalap ba la kren da u Rev Damlang Rymbai.
Mynta ka sngi U Blei haka Jingïaseng Ïalap ha ka por 1 baje nohphai sngi u Rev. M. Khongbuh Massar ula sam ïa ka ktein jong u Blei da kaba pynshong nongrim na ka Gospel u Laukas ka lyngnong 7 Dkhot 11-17, shaphang “u Jisu u long ka Jubab” ha kiba ngeit baroh.
Shuh shuh u pastor ula pynsngew shaphang ki jingeh kiba ha rukom, ha kaba kiba ngeit ki ïa kynduh ha ka jingim kaba manla ka sngi, hynrei da kaba phai sha u Jisu Khrist ka don ka jingim, ka jingpynkhiah, ka jingsuk, ka jinglaidluid bad ka jingkyrmen ha ka jingim.
Ula pynkymmaw ruh ba u Jisu u long ka jingshisha sha ka jingim bymjukut da kaba wad ïa u na ka dohnud baroh, ha ka juh ka por u kyntu ïa ki khun samla ba kin ïeng joit na kaba ïohthiah, namar wat ïa ki lum bah, ki duriaw, ki kynjri ba theh ha ka jingim ha ka kyrteng u Jisu yn lah ban jop lut ïa ki. Kum ki khun U Blei ha ka jingim ki dei ban pynkhreh ban ïashem bad la u Kynrad ong u Pastor.
Ha ka por 10 baje mynstep ha ka Jingïaseng Ïalap la kren da u T.Bn. A.S. Majaw, katba ha ka por janmiet 7 baje jong ka Jingïaseng Ïalap la kren da u Rev. E.H. Chullai.
La pynrhem ïa ka jingïaseng da ki jingrwai ba kyrpang na ki Choir ba kynthup ïa ka Jingïaseng Samla Balang Nongthymme, Standing Choir Jingïaseng Samla KJP Synod Mihngi, Jingïaseng Samla Balang Mosiang Lamare Rim kiba la rwai ha ka por 1 baje nohphai sngi, ka Jingïaseng Samla Balang Khliehriat bad Jingïaseng Samla Balang Tuber haka por 10 baje mynstep, katba ha ka por mynmiet 7 baje la rwai da ka Jingïaseng Samla Balang Lumshnong.