Nongstoiñ, Naiwieng 06 : Kum ka dak jong ka jingkynmaw burom ïa u Myntri jong ka shnong Mawkhlam-Nongpyndeng u (L) Ma Bising Dkhar, ka Nationa People Youth Front (NPYF) Mawkhlam-Nongpyndeng Unit ka la pynlong ïa ka lympung 1st Bising Dkhar Football Tournament, ïa kaba la ïoh ban pynhap pyrda noh myn ha ka 5 tarik u Naiwieng 2022 da u MLA ka Nongstoiñ Constituency u Bah Macmillan Byrsat.
Ïa katei ka lympung kaba la sdang naduh ka 13 tarik u Nailar 2022, la wan ban plie pyrda da u Myntri ka shnong Mawkhlam-Nongpyndeng u Myntri Balentin Sohlang bad ki don haduh 18 tylli ki kynhun ïalehkai na ki dong bapher bapher jong ka shnong Mawkhlam-Nongpyndeng kiba la wan ban ïashim bynta ha katei ka lympung.
Ha kane ka lympung, ka Dong Nongrim-A SC ka la ïoh ban khur ïa ka nam kum ka lahduh da kaba pynliem noh ïa ka Mawtynrong SC da 2 kol la 0. Haba ai jingkren ha katei ka sngi, na ka liang jong u kongsan u la ong ba ka jingpynlong ïa kane ka lympung Football, ka long kum shi bynta ban pyni ba ki samla jong ka party ki trei na ka bynta ban kyntiew ïa ka kam football ha ki shnong ki thaw. Kane ka long ruh kum shibynta ban wanrah ïa ka jingïatylli bad ka jingïasngewjan hapdeng ki nongshong shnong.
U la ong ba ka sorkar mynta ka la pynkreh ïa ka policy, na ka bynta ban ai jingmyntoi kyrpang ïa ki nongïalehkai sport bad ka sorkar ka kwah ban don noh da ka Reserve Quota ne ka bhah ba kyrpang na ka bynta ki nongïalehkai sport ba kham paw.
