Jowai, Nailar 07: Ka lehñiam bad ka nohrong Behdeiñkhlam kaba shisien shisnem jong ka Raij Ïalong, Raij Wahïajer bad Nongkhyllep da ka jingïarap ka suiñbneng shit ruh em slap ruh em ka la kut hynne ka sngi (07/08/2025) hapdeng ka jingiphuh iphieng, ha kaba da ki hajar ki paidbah napoh ka Raij bad nabar ki la ïawan ban sakhi ïa kane ka lehñiam bad nohrong Behdeiñkhlam ha Madan Aitnar jong ka shnong Ïalong.
Katba ki Rong ki dang wan bad shwa ban ïoh ïa ka jingkren na u kongsan ma Sniawbhalang Dhar uba long ruh u Symbud Myntri Rangbahduh ka Jylla Meghalaya, la ïoh ïa ka jingkren pdiang sngewbha ïa u symbud Myntri Rangbah, ïa u local MLA Wailadminki Shylla, ïa u MLA ka Mawhati ma Damanbait Lamare, ïa u ma Chitlang Pale Ex. MLA, ïa u Doloi Puramon Kynjin, ïa u Superintendent of Police, ïa ki Kynrem ki Lyndan kiba la khot sngewbha bad ïa ki paidbah da u ma Pyrkhat Shylla uba long ruh u President jong ka Raij. Ha ka juh ka por u ma Pyrkhat ula ai ruh katto katne ki kyntien maitphang shaphang ka Behdeiñkhlam.
U ma Sniawbhalang Dhar uba long ruh Symbud Myntri Rangbahduh ka Jylla Meghalaya u long u kongsan haba ai jingkren ha kane ka sngi u pynpaw ïa ka jingkmen ka bakhraw ba u la ïoh ka lad ban ïa don bad sakhi lang ïa ka sngi pynkut bad nohrong ïa ka Behdeiñklam jong ka Raij Ïalong, ka Raij Wahïajer bad Nongkhyllep. Nangta u ong ka jingwan jong u kam dei ka jingwan ban ïa bun ktien, hynrei wan ban ïa sakhilang ïa kane ka sngi Nohrong bad pynkut ïa ka lehñiam Behdeiñkhlam jong ka Raij bad ai ïa ki kyntien kyrkhu kyrdoh ïa ki khun ki hajar jong ka Raij Ïalong, Raij Wahïajer bad Nongkhyllep.
Ha kajuh ka por u ma Sniawbhalang u la pynsngewang 24 klur tam ban pynbha ïa ka Madan Aitnar bad u ong ba ha ka nohrong Behdeiñkhlam jong ka snem 2026 kane ka Madan Aitnar kan sa kylla rong da ka jingpynbha ïa kane ka Madan Aitnar bad ki jaka shong jong ki paidbah sawdong kane ka Madan Aitnar.
Kham ha shwa la ïoh ruh ïa ka jingkren na u Symbud kongsan ma Wailadmiki Shylla uba dei ruh u local MLA bad u la pynkhamti ha u President jong ka Raij ma Pyrkhat Shylla ïa ka Work Order kaba shiphew lak tyngka na ka bynta ka ïinghall jong ka Raij Ïalong nalor kaba u la ai mynshwa sanlak tyngka.
Mynta ka sngi la pyndep ïa ki Lehniam bapher bapher naduh ka por 1 baje, ki dong ki shnat bad ki shnong kiba dang hap hapoh ka Seiñ Raij Ïalong ki la wan pynpoi haduh 13 tylli ki Rong lane ki Rots sha ka Pyrda (Aitnar) kaba dei ka pung kyntang ban pyndep ïa ka Lehñiam ba khadduh da kaba bret ïa kitei ki jingshna dur ba itynnad da ki dong bad ki shnong hapoh ka Raid Ïalong.
