Shillong, Jymmang 27: Ka Mawlai Constituency Progressive Forum (MCPF) kala kut jingmut ban nang trei shitom katba lah ha ka ban lah pynjop biang ïa u MLA ba mynta Bah Process T Sawkmie ha ka elekshon MLA 2023 na Mawlai Constituency.
Kum shibynta ban pynkhreh ïa ka elekshon, ka MCPF kala ïakynduh lang hynne ka janmiet ban iasyllok halor ki rukom treikam ki ban nang pynkhlaiñ ïa ka jingïoh jingkyrshan u Bah Process na ki paid nongshong shnong jong ka Constituency baroh kawei.
Ki Nongïalam ka MCPF bad ki Nongkitkam baroh kila kut jingmut ban trei shitom ha kaban pynthikna ïa ka jing wan phai biang u Bah PT Sawkmie kum u MLA ka Mawlai bad ruh ban ïoh ïa ka jingjop kaba don burom ha kane ka elekshon ban wan.
Haba kren ha ka jingïalang, u Bah Process ula pynpaw ïa ka jingsngewnguh ïa ki Nongkitkam ka MCPF bad ïa ki paidbah kiba la ailad ïa u ban long u Nongmihkhmat ïa ka Mawlai la bun samoi la ka long kum u MLA ne MDC.
“Kaei kaba nga long mynta ka dei namar jong phi ki paidbah. Phi la pynkup bor bad tynrong ha nga ïa ka kam ban ai ka jingshakri. Namar kata, Nga bad ka Ïing jong nga, ngi la iarai ban ai ka jingshakri kaba bha bad ba janai tam ïa ki nongshongshnong ka Mawlai bad ban kyntiew ïa ka Shnong Mawlai ha baroh ki liang”.
“Kum u Nongmihkhmat nga la pyrshang ban trei miet la bad sngi, nga la pyrshang ban leit rung manla ka sngi sha ki shnong ki thaw bad ïakynduh ïa ki paidbah kiba donkam ïa ka jingshakri jong nga. Ngam ju klet ba dei ki paidbah kiba pynjop ïa nga” ula bynrap.
Haba pynpaw ba kum u MLA um ju don satia ïa ka jingsngew ban ñiew shiliang ne thew ïa ki briew ki bym kyr shan ïa u, u ne u MLA ula ong “ Ka jingkhang jong nga ka long kaba plie ïa baroh ki nong Mawlai kam pher la phi kyrshan ne em ïa nga ha ka elekshon. Nga long MLA ym tang jong kiba kyrshan hynrei ïa baroh ki Nongshongshnong ka Mawlai Constituency”.
U Bah Process ula kyntu ïa ki Nongkitkam ka MCPF ban nang iatrei shitom ha kane ka elekshon ban wan khnang ba ryngkat lang, yn lah ban kyntiew ïa ka Mawlai Constituency ha baroh ki liang.
