Hyderabad, Naitung, 03: U Myntri ka tnat Kam Pohing ka ri u Amit Shah u la ong ba ka BJP ka la kut jingmut ban wad ïa ki lad ki lynti na ka bynta ban weng ïa baroh ki jingeh kiba la pongding da ki phew phew snem ha ki jylla jong ka thaiñ Shatei Lammihngi ha shwa u snem 2024.
U la ong ba ka BJP mynta ka la ïoh ïa ka jaka shongneh ha North East, haba kren ha ka jingïalang jong ka National Executive Meeting kaba la long ha Hyderabad ha ka sngi u Blei.
“Ka thaiñ Shatei Lammihngi kan ym mad shuh ïa ki jingeh ha ki por ki ban sa wan bad ki jingeh baroh yn sa weng noh shwa u snem 2024,” u la ong.
Kawei na ki kam ratbah ba ka Sorkar NDA ka la shim, ka long halor ka jingweng noh ïa ka aiñ Armed Forces (Speical Power) Act, na ki 15 tylli ki police station ha ki hynñiew tylli ki district ka jylla Nagaland, ha 15 tylli ki police station ha ki hynriew tylli ki districts jong ka jylla Manipur bad ha ki 23 tylli ki Districts ka jylla Assam.
Ka Sorkar Assam bad ka Sorkar Meghalaya ha u Lber, mynta u snem, ki la ïasoi ïa ka Memorandum of Understanding ha Delhi ban pynkut noh ïa ka jingïakajia pud kaba la san phew snem kynthih. Ïa ka MoU ba ladei ïasoi la aiti da u Myntri Rangbah ka Jylla Meghalaya u Cornad Sangma bad u Myntri Rangbah ka Assam u Himanta Biswa Sarma ha u Amit Shah ha ka 31 tarik, Kyllangkot na ka bynta ka jingbishar bniah jong ka Ministry of Home Affairs.
Haba kren halor ka jingkren jong u Amit Shah, u Myntri Rangbah ka Jylla Assam u Himanta Biswa Sarma ha ka jingïakren bad ki lad pathai khubor u la ong, “ka long ka jingïaid lynti jong ngi ha ka thaiñ Shatei Lammihngi bad u Myntri ka tnat Kam Pohing u la ïathuh ïa ngi ba u da sngewkmen shikatdei namarba ngi la don ïa ka jaka shong neh ha ka thaiñ Shatei Lammihngi ha kaba ngin ym leit shuh shaei shaei.”
Haba kylli kaei ka daw kaba ka jingkynthoh jong u Amit Shah halor ka jingbym pyntreikam ïa ka Citizenship Amendment Act, u Sarma u la ong, namar ka jingpyrshah jong kiba bun ba la wanrah hakhmat ka Sorkar ka la pynslem ïa kane ka jingthmu, ka Sorkar kan pyntreikam beit ïa ka CAA.
“Phi tip ba ki Liang Pyrshah ki la pyrshah ïa kiba bun ki kam bad ïa kiba bun ki jingwanrah thymmai jong ka Sorkar u Modi kynthup ruh ïa ka CAA. Ka don ka jingpynslem tangba ngin pyntreikam beit ïa ka CAA bad ïa ki kyndon ngin sa shna,” ong u Sarma.
