Jowai, Nailur 05: Ïa ka taïew lehkmen jong ki samla ne ka ‘Youth Week & Youth Sunday-2022’ ïa kaba la buh beit buh ryntih da ka Jingïaseng Samla Khasi Jaiñtia Presbyterian Assembly kala poi noh sha kaba kuh ha kane ka sngi U Blei.
Ïa kane ka taïew la rakhe ha baroh shi taïew lynter ha kylleng ki jaka hapoh ka KJP Assemble kata naduh ka sngi nyngkong 29 tarik u Nailar haduh ka sngi U Blei 4 tarik u Nailur, 2022 halor ka phang kaba ong “Ki Samla Khristan Kiba Shlur” (Joshua: 1:9).
Ha Balang Presbyterian Khimusniang, Jowai lyngba ka Jingïaseng Samla kala rakhe ïa kane ka taïew ba kyrpang jong ki khun Samla, da kaba pynlong shibun ki prokram kiba kynthup ïa ka Jingïaseng Paidbah naduh ka sngi nyngkong ha kaba la don ka Jingkren plie ïa ka Theme da u Mr. P.L. Rymbai uba dei u dkhot Committee jong ka Balang.
Ki la don ki prokram bapher bapher kum ka jingïakop kyntip (Bible Quiz), ka jingïakop kren Subject na ka ktien U Blei, ka jingïakop rwai, ka jingïakop ban pule lyndet ïa ka ktien U Blei (Bible Bee), ka Jingïaseng ïalap, ka jingïaseng khawai jingrwai, ka prokram jingpynkhuid (Cleaning Drive) hapoh u pud u sam ka shnong, ka jingïalehkai Futsal nalor kiwei de.
Lyngba kane ka jingïaseng kala long shisha ka jingmyntoi kaba khraw eh ïa ki khun samla shynrang bad kynthei bad kan ïarap ruh ïa ki khun samla ban shemphang ïa ka ktien u Blei na ka bynta ka jingim kaba manla ka sngi.
Katba ha ka Jingïaseng Paidbah ha sngi u Trai ha ka por 1 baje nohphai sngi ïa ka khubor na ka ktien u Blei la sam da u Rev. Dr. H.C.T Sumer, da kaba pynshong nongrim na u Daniel ka lyngnong kaba 1 dkhot ba 3, 4, 6 bad kaba 7. Da kaba kyntu ïa ki samla ban long kiba shlur kum u Daniel.
“Wat lada don shibun ki jingïaleh ha ka jingim, hynrei kum ki khun samla khristan ki dei ban long kiba skhem bad kiba shlur haka kam u kynrad kumjuh ruh ha ka shnong ka thaw bad ka Ri ka jaitbynriew” la kyntu u Pastor Sumer ïa ki khun samla ka Balang.