Jowai, Naitung 05: Ki Pulit ka kynhun Anti-Narcotics Task Force (ANTF), West Jaiñtia Hills District ha ka sngi Baar ki la ïoh kem ïa lai ngut ki nongkhaïi drok na Ialong Park, West Jaiñtia Hills District ha ka por kumba 3: baje nohphai sngi. Na kine ki lai ngut, kawei ka dei ka kynthei.
Na kine ki lai ngut kiba la suba jur ba dei ki nongkhaïi drok ha kylleng ka nongbah Jowai la ïoh kurup ïa u drok (heroine) uba khia haduh 108 gram.
Ki Pulit ki la ïoh kurup ïa kawei ka Pistol 7.65 mm ryngkat bad saw tylli ki kuli, ka wait ba jrong, ka pisa kaba kot haduh 4 lak tyngka. Ia u drok la thep bha ha ki 9 tylli ki jingthep sabon bad ha uwei u klong bilor barit.
Shuh shuh ki Pulit ki la ïoh kurup ruh lai tylli ki Mobile Phones bad ïa ka kali Maruti Gypsy bad kawei ka kali Maruti 800 local taxi ba la pyndonkam da kane ka kynhun.
