Kurup palat 500 litar ka kyiad khasi bad 2,075 bilor tam ka kyiad phareng na Ïew Mawkyrwat
Mawkyrwat, Nohprah 03 : Ka Dorbar Shnong Mawkyrwat ha ryngkat ka jingïatreilang ka Seng Samla Shnong Mawkyrwat, ka VDP Mawkyrwat bad Seng Longkmie Mawkyrwat ha ka jingleit khynra ha Ïew Mawkyrwat ka la ïoh ban kurup haduh palat 500 litar ka kyiad khasi bad 2,075 bilor tam ka kyiad phareng bad la antad ruh ba ka jinglut ka poi haduh 10 lak tyngka ei ei.
Lah ban kdew ba ka jingleit ban kurup ïa kine ki kyiad ka dei naduh u bnai Jymmang haduh u bnai Nohprah, 2025 ïa kaba ka Dorbar Shnong Mawkyrwat ha ryngkat ka jingïatreilang ka Seng Samla Shnong Mawkyrwat, ka VDP Mawkyrwat bad Seng Longkmie Mawkyrwat ki la ïoh.
Kumta, kum ka dak jong ka jingïatreilang bad rad-dyngkong noh ïa kum kine ki jingdiih ba pynsniew ïa ka jingiim briew mynta ka sngi ka 3 tarik u Nohprah, 2025 ki la pynlong ïa ka jingleit-theh kyiad ha madan Jakar jong ka Shnong Mawkyrwat ha kaba la lamkhmat da ka Dorbar Shnong Mawkyrwat, ka Seng Samla Shnong Mawkyrwat, ka VDP Mawkyrwat, ka Seng Longkmie Mawkyrwat, ha ryngkat ka jingsakhi lang naduh u bah B. Jyrwa, MPS, Superintendent jong ki Pulit ka South West Khasi Hills District, u bah B.K. Jana, Additional Superintendent jong ki Pulit ka South West Khasi Hills District, u bah J.P. Lakiang, Officer Incharge ka Mawkyrwat Police Station, u bah R.R. Lyngkhoi, Myntri Shnong Mawkyrwat lem bad kiwei de kynthup ruh ki Myntri bad Secretary Shnong jong ki 12 tylli ki shnong kiba marjan bad ka Shnong Mawkyrwat.
Kiba la ai jingkren ha kane ka sngi shwa ban theh ïa ki kyiad ki long u bah D.D. Thongni President VDP Mawkyrwat uba long ruh u nongpynïaid ïa ka jingïalang, u bah W.C.D. Toi, Secretary VDP Mawkyrwat, ka kong M. Kharlyngdoh, President Seng Longkmie Mawkyrwat, u bah Kitbor Lyngdoh uba dei u President jong ka Seng Samla Shnong Mawkyrwat ha kaba na ka liang jong ki ki la pan ka jingïatreilang na ki shnong ba marjan ban don ka jingïalong kawei khnang ban lah ban rad-dyngkhong ïa ki jingsniew kiba ker sawdong bad kiba lam sha ka jingjot ïa ki khun samla, ki longïing longsem, ka imlang ka sahlang, ka ri bad ka jaidbynriew.
Ha kajuh hi ka sngi, ka Dorbar Shnong Mawkyrwat ka la ïoh ruh ban pynkup burom kyrpang ïa bah R. Rymbai, Traffic Officer jong ka Mawkyrwat Police Station.