Shillong, Risaw 21: Ki Pulit ka East Jaiñtia Hills kiba la ïoh jingtip kaba bniah na ki tnat syntiat, ha ka 18 tarik mynta u bnai ha ka por kumba 8.15 baje mynmiet ki la ïoh ban khang kdong ïa kawei ka kali Tata Sumo kaba don u nombar ML-04B-5885 ba la ñiah da u Solomon Hmar, 24 snem ka rta ha Kongong Police Check Post. East Jaiñtia Hills.
Ha ka jingkhynra ïa ka kali, ki Pulit ki la ïoh kurup 18.764 kilo u Ganja, bad ïa ki mobile phone kynthup ka pisa na uwei uba shong hapoh ka kali uba kyrteng u Lalrem Rauta Hmar, 23 snem ka rta.
Ïa ki mar ba la ïoh kurup la rah sha Khliehriat Police Station bad la pynngat hapoh ka Section 8(c)/20(b)(ii)(b)/29 NDPS Act.
Ha ka 19 tarik mynta u bnai ha ka por 9 baje mynstep, katba ki Pulit ki dang talasi ïa kiba tam bilor ha Polo, Shillong, ki la ïoh bat ïa uwei u Sunil Thapa, 29 snem ka rta bad na ka met jong u, ki la ïoh kurup ïa u wei u tyndong plastik barit ba la thep ïa u suba drok herion uba khia 0.07 gram. Na ka met jong u ki Pulit ki la kurup ruh kawei ka mobile phone, kawei ka ATM card bad ka pisa T. 3,889 hajar.
