Shillong, Ïaïong, 18: Ki shipai ïada khappud jong ka tnat Border Security Force (BSF) kiba ju peitngor bha ïa ki kam khaii be-aiñ ha shilynter ka khappud, ha ka sngi Saitjaiñ ki la ïoh kurup palat 1200 bilor ka kyiad ïa kaba la thmu ban shalan beain sha ka ri Bangladesh na ka khappud (International Border) jong ka West Garo Hills bad ka South Garo Hills.
Ha Bangladesh, la mana da ka aiñ ban dih kyiad, katkum ki kyndon aiñ jong ka Niam Islam. Hynrei watla katta, ïa ka kyiad lah ban ïoh ha baroh kawei ka ri Bangladesh, namarba kiwei pat ki jaidbynriew ki bym dei ki Muslim kiba sah ha ka Ri Bangladesh bad kiba shu leit jngohkai kim shah teh satia ha ki kyndon bapyrkhing jong ka aiñ namarba la ailad ba kin dih ïa ka kyiad tang hapoh ing ym ha ki jaka paidbah, ong u kyrwoh na ki BSF.
“Ki don ruh ki kompeni ba la ai jingmynjur da ka Sorkar ban shna ïa ka kyiad, kiba pynmih ïa ka kyiad hynrei ki duna bha katba la die pat ha ka dor kaba rem. Dei na kata ka daw ba ka kyiad ka kham tad dor ha India haba ïanujor bad ha Bangladesh,” ong u kyrwoh.
Ki shipai Border Security Force kiba ju lap ïa ki lynti ïaid jong ki snar nongkhaii be-aiñ ki ju pynlong ka jingap shrip ban ïohkem ïa kiba donkti bad ban khanglad ïa ka jingkhaii be-aiñ na khappud ka ri India sha Bangladesh.
