Nongpoh, Rymphang 10: Da ka jingpeitngor bad ka jingbuddien lyngbaka jingïatrei lang ka Dorbar Shnong Bhoirymbong Lumsohpieng bad ka VDP mynta ka step ki la ioh ban bat ïa 3 ngut ki rangbah bad ryngkat ka jingioh kurup ïa ka kyiad pyrsi kaba la kot da ki phew litar ha ki bynta jong ka surok ban leit sha ka Shnong Mynsain.
Kane ka jingioh kem ka Shnong bad ki VDP ïa kitei ki 3 ngut ki rangbah na ki bynta jong katei ka surok, ka dei ba ki la ioh lum jingtip naduh hynnin ka meit ba kitei ki rangbah ki dang don ha katei ka jaka bad dei haduh mynta ka step ha ka jingïalam u Rangbah Shnong u Bah Hamjngai Hinge lem bad ki VDP ki la leit sha katei jaka ba ki la ioh bat ïa kitei ki 3 ngut bad ha ka jingtohkit ki la lap ïa ka kyiad ba ki la buhrieh sha ki jaka khlaw ha katei ka jaka.
Haba kren sha ki lad pathai khubor, u Rangbah Shnong u Bah Hamjngai Hinge, u la ong ba dei tang hadien ba la ioh kem ïa kitei ki 3 ngut bad ba la ioh ban kurup ïa ka kyiad ki la leit aiti noh ïa ki sha ki Pulit jong ka Khapmara PIC ba kin leh katkum ki kyndon jong ka ain.
U la ong ruh ba ka Shnong Bhoirymbong Lumsohpieng ka pynrem jur ïa kum kine ki kam beain ba la shu die kyiad beain ha ki shnong ki thaw bad na ka liang ka shnong kan dang pynjur ïa ki jingpeitngor bad kan nym ailad ïa kino kino ki briew ban wan die kyiad beain hapoh u pud u sam jong ka Shnong Bhoirymbong Lumsohpieng.
Shuh shuh, ha kawei ka bynta, u la khot la wer ruh ïa ki Dorbar Shnong jong ki shnong ba marjan ban don ka jingïatrei lang na ka bynta ban pynduhjaid ïa baroh ki jaid jingsniew bad kumjuh ruh kum kine ki kam die kyiad beaiñ da ka jingïatrei na ki shnong ba marjan yn lah ban pynduhjaid bad ruh ïa kiwei kiwei ki kam sniew kiba ktah ïa ka imlang ka sahlang, u la bynrap.
