Shillong, Naitung 14: Ki shipai Assam Riffle na Mizoram, hadien ba ki la ïoh ïa ka jingtip ba don kiba kit ïa ki tiar Tikli ba ju pynbthei Dynamite ha ki bynta jong ka Chanmari, halor kane ka jingtip ha ka sngi Nyngkong ki la pynlong ïa ka jingap shrip ryngkat ki pulit ka Mizoram.
La ïathuh ba ha kane ka jingap shrip ki la ïoh ban kurup ïa ka song bad haba la plied la shem ba ki dei ki Tikli ban pynbthei Dynamite, kane ka jingïoh kem ka la jia ha Chanmari hapoh ka nongbah jong ka jylla Mizoram ka Aizawl.
Shuh shuh ki shipai ka Assam Riffle ki la ïoh ban kem ïa ki briew kiba la shah kynnoh ba ki donkti ha kane ka kam ban ri ïa kine ki Tikli, hadien ba ki la pyndep ïa ka jingtohkit kila aiti ïa kine ki Tikli bad ïa ki briew sha ki pulit ka jylla Mizoram ban leh ïa kaba donkam katkum ka aiñ.
La ïoh ban kem bad kurup ruh ïa kine ki tiar pynmynsaw da ka kynhun kaba kyrpang jong ki Shipai ka Assam Riffle kiba la trei shitom lyngba ka tnad ban ïakhun pyrshah ïa ki kam khaïi beaiñ, bad ïa kane ka jingïoh kurup ïa kitei ki tiar pynbthei la buh ha ka jingpyntip jong ki Shipai ka Assam Riffle ha ka “X”.
