Kurup ki pulit ka Byrnihat haduh 90 byrni u kwai supari ba khaïi beaiñ

Nongpoh, Naitung 05: Da ka jingtrei shitom ki Pulit ka Byrnihat Police Outpost bad hadien ba la ioh ka jingtip kaba bnïah sha ka jingdon ka jingshalan beaiñ ïa u kwai Supari, ki ar tylli ki Bus Nigh Super ki la ngat ha ka shrip ki pulit ba la pynap shrip mynta ka sngi ha Byrnihat kaba dei halor ka jingdon bynta ban shalan beaiñ ïa u kwai Supari.
Dei lyngba ka jingpynap shrip ki Pulit ka Byrnihat Police Outpost ha Byrnihat, ki ar tylli ki Bus Night Super ki la shah bat bad na kitei ki ar tylli ki Bus Night Super ki pulit ki la ioh ba kurup haduh 90 byrni u kwai supari ba la kynnoh ba la shalan beaiñ da u trai jong kitei ki Bus Night Super.
Kumba la ioh lum jingtip, ki Pulit ki la ioh ban kurup ïa kitei ki kwai supari na kitei ki Bus ka dei ha ka por 6 baje mynstep mynta ka sngi hadien ba kitei ki Bus ki la poi shah pynap da ka khyrdop Naka ha Byrrnihat Police Outpost ha Ri Bhoi.
Kumba la batai da uwei na u Dribar katei ka Bus Night Super ba la tip kyrteng kum u Rafikul Rehman, u la ïathuh ba ïa ki ne ki supari la wanrah da u trai jong kine ki bus hi u Hiren Ali bad kumba 44 byrni la thep haka bus AS01DC7860 kaba dang mih na Jiribam bad thmu ban leit sha Guwahati,bad ïakiwei pat la thep haka wei ka bus kaba don ïa u number AS01HC9034 kaba dang mih na Dharmanagar bad thmu ban leit sha Guwahati.
Halor kane ka jingioh bat ïa kitei ki Bus Night Super bad ba la ioh kurup ïa utei u kwai supari, na ka liang ki Pulit ka Byrnihat hadien ba la dep ban tohkit ki la aiti noh ïa utei u kwai Supari sha ka tnad Custom ba kan leh katkum ki kyndon jong ka aiñ.
Shuh shuh, la pyntip ruh ba kane ka kam dei ka sien kaba nyngkong nyngkong ba u trai jong kine ki bus, u Hiren Ali bad ki bus jong u ba ki shah kem haki tnad pulit, hynrei la kum ba 4 ne san sien ki la ngat haki kti jong ki pulit ka Ri bhoi ba ki ju don kti ban khaii beain ïaki ne ki kwai supari, ong ka tyllong khubor ba la ioh lum.