Shillong, Nailur, 01: Ki Pulit jong ka North Garo Hills Police ha ka sngi Palei ki la kem noh ïa uwei u briew bad kurup ruh saw tylli ki biskit ksiar kiba khia shiteng kilo bad ba la antad ba ki shongdor T. 25 lak.
Ïa une uba la shah kem na Rani Point, Turala ithuh kyrteng kum u Hamidul Haque uba la 27 snem ka rta uba dei na Cooch Behar, West Bengal.
Ka jingïoh kurup jong ki Pulit ïa kine ki biskit ksiar ka dei hadien ba ki la pynlong ïa ka jingtalasi kyndit ïa ki kali ha surokbah jong ka North Garo Hills.
Ka jingïoh kem jong ki Pulit ïa u Haque ka long hadien ba ki la ïoh jingtip ba un leit Tura da kawei ka kali Bolero.
U Superintendent of Police jong ka North Garo Hills u Shailendra Bamaniya haba pynthikna ïa kane u la ong, “ngi la pynlong ïa ka jingtalasi ha surokbah ban ïohkem ïa ki tiar be-aiñ hynin ka sngi lyngba ka surok Rari bad Bajengdoba hynrei haba ka kynhun jong ngi ha kane ka por ka la pynieng ïa kawei ka kali Bolero ka bym don satia u number plate. Ynda la pynlong ka jingtalasi ïa ka kali, la lap pynban ïa ki biskit ksiar ba la buhrieh bha hapoh ka kali.”
Ha ka jingtohkit, u Haque um shym la lah satia ban ai jubab ne ban pyni ïa kino kino ki kot ki sla ha kaba ïadei bad ka jingthied ïa kine ki biskit ksiar.
Ïa u Haque hadien ba ki Pulit ki kem noh ïa u ki rah sha kashari ban tian bishar ïa u.
