Shillong, Nailar 23: Da ka jinglah ban shim kam mardor, na ka liang ki pulit ka South West Garo Hills ki la ïoh ban khangkdong ïa ki nongkhaïi beaiñ ïa ki dawai kuli Yaba ha ka jingkhynra jong ki, kaba la long ha ka janmiet jong ka sngi Thohdieng ha ka surok lai dong ka shnong Kalaichar.
Ha kane ka jingkhynra, arngut ki briew ki la shah kem kiba kyrteng u Dil Islam ba la 40 snem ka rta bad u Faruk Sk ba la 50 snem ka rta, katba ki dang shong da ka thuk thuk kaba don u nombar ML 08D 5693.
Na kitei ki briew ki pulit ki la ïoh ban kurup haduh 1910 tylli ki dawai tablet bad ryngkat ka pisa T. 34,500.
Kane ka jingkhynra ki pulit ka long ban pynduh jait ïa ka kam khaïi beaiñ ïa ki jingdih pynbuaid ha kane ka thaiñ.
Na ka liang ki pulit mynta ki dang pynlong ka jingtohkit ban lap ïa ki tyllong bad ki jaka ba la wanrah ïa kine ki dawai kuli Yaba.
