Nongpoh Naitung 19: Ki pulit jong ka Basistha Police Station jong ka jylla Assam hynnin ka miet kila ioh ban bat ïa kawei ka trok kaba don ïa u number UP 14 KT 4136 ha Jorabat katba ki dang thmu ban shalan beaiñ ïaka kyiad phareng Indian-Made Foreign Liquor (IMFL) sha ka jylla Bihar.
Katei ka trok ka dei kaba dang mih naka jylla Meghalaya bad thmu ban leit sha Bihar hynrei ïa katei ka jingshalan beaiñ la ioh noh ban pynpulom da ki pulit hadien ka jingpynap shrip ha Jorabat, bad iohkem ruh ïa u nongñiah bala tip kyrteng kum u Sudhir Kumar Ray (38) na Bihar.
Haka jingtalasi jong ki pulit kila lap ruh ïaki hajar tylli ki kyiad bilor bala shna na Meghalaya kiba la buhrieh bha haki synduk Harpic ba ju pyndonkam ban sait paiñkhana tang ban lait naka jingshah kem haki pulit.
Ka kyiad bala ioh kurup da ki pulit ki kynthup ïa 1320 bilor ka Royal Stag, 740 bilor ka Royal Challenge bad 4080 bilor u Harpic ba sait paiñkhana.
