Shillong, Nailur 06: Ki pulit jong ka Anti Narcotics Task Force (ANTF) ha ka miet jong ka sngi Thohdieng, ki la pynlong ïa ka jingkhynra ha Nongrah Nongpdeng ha kaba kila ïoh kurup ïa u drok Heroin u ba don 218.94 gram uba shongdor T.1 Klur.
La ong ba ka ANTF haba ka la ïoh ïa ki jingtip kiba thikna, kala leit ban khynra ïa ka ïing kaba shongwai da ka Nengneilhing Khongsai kaba la don 41 snem ka rta, kaba don ha ka shnong Nongrah Nongpdeng Shillong bad ha kane ka jingkhynra kila ïoh ban kurup ïa ki 18 tylli ki synduk buh sabon ha kaba la buhrieh ïa u jingdih uba la suba jur u dei u Heroin.
Ka ANTF kala ïoh kurup ïa une u jingdih na ka kamra ka jongka Khongsai bad une u jingdih u don 218.94 gram bad u shongdor T.1 Klur tyngka. Kane ka longkmie kala shah kem noh ha ki pulit bad la rejistar case ïa ka hapoh ki kyndon jong ka NDPS Act.
