Shillong, Naitung 23: Hadien ba la ïoh ka jingujor, na ka liang ki pulit ha ka 20 tarik mynta u bnai ha ka por 6.30 janmiet, ki la pynlong ka jingtalasi ha Damcherra Kuliang NH-06 (EJH) bad ki la ïoh ban khang kdong ïa kawei ka Toyota Innova (AS-01BV-6264) ha ryngkat bad uwei uba shong uba kyrteng u Babul Madhi ba la 29 snem ka rta bad na u ki la lap bad kurup kumba 381.63 kg u suba kynja (cannabis) napoh kane ka kali. Hynrei ha kane ka jingjia uba ñiah katei ka kali, u la ïoh ka lad ban phet krad na kane ka jaka.
Ha kawei pat ka jingjia, hadien ba la ïoh ka jingujor ha ka 20 tarik mynta u bnai ha ka por 6.20 mynstep, hadien ka jingïoh jingtip kaba thikna, ki pulit ki la pynlong ka jingtalasi hapoh kawei ka ïing ha Lower Phulbari (WGH), kaba la shim wai da 3 ngut ki briew kiba kyrteng u Rochan Ali 24 snem, Rofikul Rahman 31 snem bad Abhijit Rabha ba la 24 snem ka rta kiba dei na Assam ha kaba ki pulit ki la lap bad kurup kumba 95.78 grams u suba drok, nangta ka pisa T. 1,53,790/-, artylli ki empty vial, artylli ki iPhone, kawei ka keypad mobile phone, bad kiwei kiwei ki tiar na ki.
