Shillong, Jylliew, 26: Ki shipai Border Security Force (BSF) ha ka sngi Saitjaiñ ki la ïoh kurup ïa ki dawai, ki jingsleh pynbhabriew bad ïa ki jaiñ kiba shongdor palat T.20 lak ha ka jingkhynra bapher bapher ha khappud ka jylla ïa kiba la thmu ban shalan be-aiñ sha ka ri Bangladesh.
Hadien ba la ïoh ïa ka jingtip kaba bniah na ki tnat syntiat, ki shipai BSF kiba ap pahara ha khappud West Jaintia Hills ki la pynpulom ïa ka jingthmu ban shalan be-aiñ ïa ki dawai kiba shongdor shiphew lak khyndai phew hajar.
Ha kajuh ka por, ki shipai BSF kiba ap pahara ha khappud ka South West Khasi Hills bad East Khasi Hills ki la kurup bun bah ki jingsleh pynbhabriew bad ïa ki jaiñ.
Ki shipai BSF kiba ap pahara ha Pyrdiwah ki la ïohkem ïa uwei u nong Bangladesh uba la tip kyrteng kum u Feroz Ali, 18 snem na Sylhet, Bangladesh katba u dang rah be-aiñ ïa ki jingsleh pynbhabriew ba shongdor T.9 lak na India sha Bangladesh.
