Shillong, Ïaiong 29: Ki shipai ka Border Security Force (BSF) ka Meghalaya Frontier, hynnin ka sngi palei, kila ïoh ban kurup haduh 125 kilo u sniuh briew ba thmu ban khaii tuh sha Bangladesh na ki thaiñ khappud ka East Khasi Hills.
Kat kum ka jingong ki shipai, ïa une u sniuh briew la pyndonkam ha Bangladesh ban shna ïa ki sniuh ba shu buh (wigs) ban pyndonkam hapoh ka Ri bad kumjuh ruh ban khaii shabar ri. Naduh u snem 2022, ki shipai BSF kila ïoh ban kurup haduh 225 kilo u sniuh briew ba khaii tuh sha Bangladesh.
Nalor kane, ki shipai BSF kila ïoh ruh ban kurup haduh 73 tylli ki masi na khappud ka East Jaiñtia Hills katba ki nongkhaii ki dang ïalam sha khappud ka Bangladesh ban khaii tuh.
Tang ha une u bnai Ïaiong 2022, ki shipai BSF ka Meghalaya Frontier kila ïoh kurup haduh 450 tylli ki masi ba thmu khaii tuh. Namar ka jingjur ka jingkhaii tuh, ki shipai BSF kila nang pynkhlaiñ ïa ka jingpahara ban khanglad ïa baroh ki kam bymman ha ki jaka khappud.
