Shillong, Risaw, 13: Ki shipai Border Security Force (BSF) jong ka 4th Battalion kiba la ïoh jingtip kaba bniah na ki tnat syntiat ki la pynlong ïa ka jingap shrip ha khappud ha kaba ki la ïoh kurup 27 tylli ki masi bad ki muid ba la thmu ban khaii tuh sha ka ri Bangladesh.
Katkum u kyrwoh ba la phah da ka tnat shipai BSF la pyntip ba ïa kine ki masi la buhrieh ha kawei ka jaka khlaw hajan ka khappud ka Indo-Bangladesh ha ki bynta jong ka West Jaintia Hills District bad ha East Khasi Hills District.
Ïa kine ki masi bad ki muid ba la ïoh kurup la aiti noh sha ki Pulit ban leh ïa kaba donkam katkum ki kyndon jong ka aiñ.
