Kurup ka Sorkar ïa ki Bank Account u Bah G. K. Ïangrai halor ka jingshah kynnoh bamsap
Shillong, Nohprah, 07: Ka Sorkar Jylla ka la kurup noh ïa ki Bank Account jong u Bah GK Ïangrai, u Heh Pulit uba la shah kem halor ka jingshah kynnoh ba u donkti ban bam klop ïa ka pisa ba la mang ban shna ïa ka NERS PSAP ha Sadar Police Station Complex, Shillong.
Ïa kane la pyntip hakhmat ka Iingkashari Meghalaya High Court haba shong bishar ïa ka PIL halor kane ka kam.
Ka Sorkar Jylla ka la pyntip ba u Bah G..K. Ïangrai u don mynta hapoh ka Judicial Custody bad la ai jingbit ruh ban ujor sa ar tylli ki jingujor pyrshah ïa u.
Ka Sorkar ka la pyntip ruh ïa ka Ingbishar Meghalaya High Court ba ki Bank Account jong u Bah Ïangrai ladep ban kurup bad la buh ruh ïa ka jingkyrpad katkum ka kyndon 105 jong ka Criminal Procedure Code hakhmat jong u Session Judge. La khmihlynti ruh ba yn sa ai ïa ka jingpynshitom pyrshah ïa u.
Ka Iingbishar ka la buh sngi ban shong bishar biang ïa kane ka kam ha ka 9 tarik Lber 2023.
Ha ka 2 tarik, Naiwieng, ki Pulit CID ki la kem ïa u Bah GK Ïangrai uba bat ïa ka kyrdan Commandant jong ka SF-10 Battalion halor ka jingkynnoh ba u donkti ha ka jingbam klop ïa ka pisa ba la mang ban tei ïa ka NERS-PSAP ha Sadar Police Station.
U Bah Ïangrai, uba long long u Assistant Inspector General of Police (Administration), barim u la shah kem na ingsah na jong u kaba don ha Shyiap, Golflink, hadien ka jingkhynra jong ki Pulit. Tang hadien ba la shahkem u la ngat ha ka jingshah sospon na ka kam.
U Inspector General of Police (IGP) CID, Meghalaya u Bah O. Pasi ha u kyrwoh u la ong ba ïa ka case la rejistar ha ka 28 tarik, Risaw, katkum ka jingkynnoh ba u Bah GK Ïangrai u donkti ban bam klop ïa ka pisa ha kaba shna ïa ka NERS PSAP ha Sadar PS Complex.
“Ha ka jingtohkit, ha ka 02/11/2022, la pynlong ïa ka jingkhynra ha kiba bun jaka kata, ha Lumshyiap, Chanmari, Upper Golf Links, Shillong-1, Official Quarter ha Golf Links bad ha Farm House, Rtiang, Umsning, Ribhoi hadien ba ka jingpynmih Warrant da ka Ingkashari u Special Judge (PC Act), Shillong,” ong u Bah Pasi.
“Ha ka jingkhynra, la ïoh kurup bun ki kot ki sla, ka pisa bad ïa u Bah Ïangrai la kem. Ka jingtohkit pyrshah ïa u ka dang ïai bteng,” u la bynrap.