Kurup drok ki pulit Lumshnong bad kem noh ïa kiba don kti kynthup uwei u pulit DEF

Khliehriat naitung 28:Kum shibynta kum ka jingbteng ïa ka campaign halor ban ïakhun pyrshah ïa u drok, ki pulit ANTF ha ryngkat ka jingiatrei bad ki pulit jong ka Lumshnong Police Station mynta ka sngi ki la pynap ktem bad ïoh kurup ïa u drok haduh 201 gram bad la suba ba u dei u drok herion, ha kaba ïadei bad kane, ki pulit ki la kem noh ïa u Nisooki War, 29 snem kyrta, uba na ka shnong Lamyrsiang East Jaiñtia Hills District.

Dei hadien ka jingtohkit jong ki pulit, la lap ba uwei u pulit ABC/85 jong ka Reserve Police East Jaiñtia Hills District ruh, uba dei ruh u pulit jong ka District Executive Force, uba kyrteng u Triplepearl Pasi u don kti  jar jar ha kaba ïadei bad kane ka jing ïoh kem ïa une u drok mynta ka sngi, kumta ki pulit ki la kem noh ïa utei u pulit ABC ruh.

Ïa ka kali ba shong u Nisooki War ym shym la bat namar ba ka dei ka kali kamai kaba wan na Assam, ha kaba uba ñiah ïa ka kali kamai bad ki nong shong kali kim don jingtip eiei ïa kane ka jingrah drok.

Ïa ka case la register ha Lumshnong Police Station (case No:25(7)2022 ) bad la pyn ngat hapoh ki kyndon aiñ B(c)/21(b)/29 kiba hap hapoh ka NDPS Act bad ka jingtohkit ka dang ïaid sha khmat.