Kurup drok ki pulit EJHD bad kem 4 saw ngut kiba donkti kynthup ar ngut ki kynthei

Khliehriat Jylliew 24: Ka kynhun jong ki pulit ANTF ka East Jaiñtia Hills District hapoh ka jingïalam u DySP Crime, u Bidhan Bhattacharjee MPS, ha ka sngi Nyngkong ki la ïoh ban kurup 164 .99 gram u drok ba la thep ha ki khatsan tylli ki synduk sabon, halor kane ki pulit ki la kem ïa ki saw ngut kiba donkti, kynthup arngut ki kynthei bad kawei na ki ka dei ka snar khaïi drok kaba la shah kem teng myn ha u snem 2023.
Kiba la shah kem ki dei kiba la tip kyrteng kum u Sahin Hussain Laskar, uba na ka shnong Nagdirgram, Cachar Assam, u Rofiqul Alom Laskar, uba na ka shnong Harsinghpur Nagdirgram, Cachar Assam, ka Mamta Sinha, kaba na Simgiri, Chibitabicha, Cachar Assam, ïa kine ki laingut la kem na Umtyra bad ïa ka Maya Gwala alias Puchki kaba na Pynthorbah Shillong, ki pulit ki la kem na Khliehriat katba ka dang ap ban shim ïa ki drok ba la wanrah da kitei ki laingut.
Ki tyllong khubor ki ïathuh ba ka Maya Gwala alias Puchki, ka dei ka snar khaïi drok kaba la shah kem teng myn ha u snem 2023 ha ki pulit Khliehriat ha kaba ïadei bad ki kam khaïi drok ha kaba la register case ïa ka hapoh ki kyndon jong ka NDPS Act, 37(05)23 u/s 21(b)/29 NDPS Act 1985 bad mynta ka la shah kem biang ha ki pulit Khliehriat, la ong ruh ba kane ka snar khaïi drok ka dei kaba la don case teng ruh ha Shillong.
La ong ba kitei ki laingut kiba rah ïa u drok ki la shong da kawei ka kali private, Hyundai Venue kaba don u registration nombar AS 01 EJ 8977, kaba dang wan na ki thaiñ Silchar, ki pulit ki la ïoh bat ïa kane ka kali ha Umtyra ha ka jaka ba ki la pynap ktem bad hadien ba ki la pynlong ïa ka jingkhynra ki la lap ïa u drok ba la thep ha ki khatsan tylli ki synduk sabon, hadien ba la test la lap ba u dei u drok.
Hadien ka jingtohkit ki laingut kiba la shah kem na Umtyra ki la ïathuh ba ïa u drok ki mut ban leit ai ha kawei ka briew ba kyrteng ka Maya Gwala ba ju khot sin Puchki kaba dang ap ha Khliehriat.
Ki pulit ki la register ejahar pyrshah ïa kitei ki saw ngut ha Khliehriat Police Station bad ka jingtohkit ka dang ïaid, ki pulit ki la kurup noh ruh ïa katei ka kali ba ki pyndonkam bad ki mobile phone.