Nongpoh, Risaw 14: Uwei na u snar Nongkhaïi drok beain mynta ka sngi u la ngat ha ka shrip ki pulit ka Assam lyngba ka Speical Task Force kiba la ioh ban bat ïa kawei ka trok ban kem ïa u nongkhaïi bad ryngkat ka jingioh kurup ïa u Drok ba la shongdor T. 4 klur tyngka.
Katkum ka khubor ba la ioh lum, la ong ba ki Pulit STF ka Guwhati, hadien ka jingioh jingtip kaba bniah ki la pynlong ïa ka jingpynap shrip ha North East Cancer Hospital ha khappud ka Meghalaya bad ka Assam, ha kaba ki la ioh ban bat ïa kawei ka trok ba don ïa u number AS 01RC2336 kaba dang hiar sha ka nongbah Guwahati.
‘Dei hadien ba la pynlong ïa ka jingtalasi, ki pulit ki la ioh ban kurup haduh 45 tylli ki kynja synduk sabon ba la thep ïa u drok Heroin, ha kaba ka jingkhia ka la kot 537.2-gram bad shongdor palat T. 4 klur ha kaba la kynnoh ba wan rah na ka jylla Nagaland ban pynpoi sha ka nongbah Guwahati.
Na ka liang ki Pulit STF ka Guwahati, hadien ba la ioh kurup ïa utei u drok ba la shongdor da ki klur tyngka, ki la kem noh ïa utei u nongkhaïi drok bad uba dei ruh u dribar katei ka trok ba la tip kyrteng kum u Rananjay Mandal, 46 snem ka rta na ka shnong Bamunkuchi jong ka district Barpeta bad uba la sah mynta ha Bengali Basti jong ka nongbah Guwahati bad ka jingtohkit halor kane ka jingioh kem drok ka dang ïaid shakhmat.
